Independiente di fundacion Adopt An Addict su preocupacion riba e problema di adiccion cu pa nan ta subiendo, pa minister demisionario di husticia, Arthur Dowers, kende ta responsabel tambe riba e maneho di adiccion, e satisfaccion mas grandi tabata esun di rescata persona adicto, specialmente hende jong, for di gara di droga.

“Mi ta sali cu hopi orguyo y cu hopi satisfaccion fei di e funcion aki. Pasobra mi sa cu nos a logra. Nos a yega na curason di ser humano y esey ta pa mi e cos mas importante”, el a bisa.

E echo di saca un mucha cu ta wordo abusa pa hende y cu ta victima di droga y cu bo logra trece den un centro di rehabilitacion y percura cu e por sali fei di adiccion di droga pa medio di tratamento y cuminsa biba un bida digno y protegi pa nos autoridad. “Esey pa mi ta parti di e satisfaccion mas grandi cu mi tabatin”, el a declara durante un entrevista cu Bon Dia Aruba.

E logro aki solamente tabata posibel segun sr. Dowers, cu e cooperacion di tur departamento concerni cu ta percura cu e persona aki por haya tratamento y sali fei gara di mal bida di droga. Ta e caso di adictonan cayehero cu a wordo convenci pa bay den tratamento, y cu awor nan ta rehabilita. E ta refleha pa kico e ta bin realisando su trabou manera mandatario di husticia y responsabel riba e maneho di adiccion, segun e.

E ta haya cu los di e proyectonan grandi cu a wordo realisa durante e dos periodo di gobernacion di gabinete Mike Eman I y II, na final e aspecto mas importante ta cu e hende jong rescata fei di droga tin felicidad. Tur trabou cu ta wordo realisa pa combati cualkier cos cu por stroba e felicidad aki pa medio di intervencion of prevencion, e ta duna bo un satisfaccion, segun sr. Dowers.

Momento mas dificil
Sr. Dowers ta haya cu e periodo mas dificil cu el a yega di confronta como mandatario, y no solamente su persona sino cu demas coleganan, tabata definitivamente ora a presenta e confrontacion cu Hulanda. E tabata e temporada cu minister presidente a inicia un protesta contra Hulanda dilanti gabinete di gobernador.

Sr. Dowers a relata cu durante e fase ey, el a keda responsabel di hopi cos, incluso e siguridad di e pais, y cu e tabata den combersacion cu tur tipo di hende. “Tabatin hopi cos cu a sosode e dianan ey cu hopi hende no sa y mi ta kere cu nan no lo haya sa tampoco”, el a bisa.

A pesar di e circunstancia cu a presenta rond di e episodio historico aki, e ta haya cu nos pais a sali trankil sin cu nos hendenan por a pasa den situacion cu nos ta haya duele di dje, incluso te hasta su mesun coleganan, manera nos a yega di wak den diferente paisnan di mundo.

“Esey tabata pa mi e momento mas dificil di e maneho di e caretera di husticia”, el a bisa. E ta relata cu tabatin un dia cu nan a pasa 24 ora lanta den combersacion cu tur hende na Aruba, Hulanda, etc..

Logronan
Durante su conferencia di despedida, minister Dowers a trece dilanti diferente logro riba tereno di husticia. Pero un asunto cu a keda pendiente y cu e tabata kier concretisa tabata un ley pa proteha mas ainda nos comunidad contra traficacion di droga cu ainda ta wanta cerca gabinete di gobernador, segun e minister demisionario aki.

E ta un ley contra uzo y penetracion di droga den nos comunidad. E ta aclaria cu e no tin niun pensamento specifico contra un hende cu ta uza droga of a bira victima di dje. Pero loke si e ta contra ta riba esunnan cu ta pusha e droga riba e hendenan aki. “Mi ta kere cu nos por haci mas como comunidad pa proteha hende di e uzo y cu e droga ta yega cerca nan facil special mucha hopi jong”, el a bisa.

E ta lamenta cu nos por mira hopi mucha cu nan futuro a wordo frustra of daña pa e traficacion y comercio di droga. Nan a bira criminal y nan a bira victima di abuso y maltrato hustamente pa motibo di droga. “No laga niun hende gaña bo cu droga ta un cos bon”, segun e mandatario.

Otro proyecto cu Bon Dia Aruba confronta e mandatario saliente cu ne tin di haber cu e uzo di camara di siguridad. Un proyecto cu a haya hopi publicidad, pero cu no a wordo realisa of concretisa debidamente.

Segun sr. Dowers e proyecto aki a confronta varios contratiempo. El a bisa cu e proyecto di camara a keda cla den su prome fase, lero lamentablemente nan a haya confrontacion cu e grupo di persona cu tabata ehecuta e proyecto aki. “Lamentablemente na final nan no a coopera manera ami ta haya cu un grupo cu a haya tanto placa pa un proyecto mester hacie. El a laga sa cu e proceso aki ta uno cu e mes no a entama. E ta revela cu e proyecto aki tabata uno completamente independiente.

Na final el a laga sa cu mester a pidi otro compania pa interveni den e proyecto aki pa nan por logra cu e por funciona. Sr. Dowers a indica cu otro grupo a tuma over e proyecto di camara di siguridad, y e ta spera cu denter di poco tur cos lo ta funcionando optimal.

Legalisacion marihuana
Encuanto e discusion riba uzo di cannabis of marihuana ya sea pa uzo medicinal of tambe recreacional, e ta totalmente contra dje. “Nos no mester pretende tampoco cu esaki ta algo light…”, el a bisa

E mandatario saliente ta keda para riba cu no solamente e, sino cu Nacionnan Uni mes a bisa cu consumo di droga ta un crimen contra humanidad. E no ta haya cu ta bon pa disfrasa e asunto aki di legalisacion di droga como algo normal, mientras tin hopi hende cu ta sufri y muri pa causa di e problema aki.

E ta haya cu e discusion aki ta uno academico cu no tin niun sentido den e debate cu ta wordo hiba publicamente aworaki. “Masha hopi aña caba droga ta wordo uza pa necesidad medicinal. Na Ingles un botica ta wordo yama drug store of tienda di droga, pues esey no ta algo nobo”, segun sr. Dowers.

E ta haya cu e asunto aki di uzo di droga cu fin medicinal ta un asunto di cientificonan y “no di sinberguensanan cu ta venena yiu di hende, y despues ta pretende cu nan ta haci esaki bou un capa medicinal”

Parlamentario atrobe
Ya caba minister demisionario, Dowers a huramenta den su funcion nobo como miembro di e fraccion di AVP den oposicion den parlamento. Prome cu el a drenta den gobernacion na aña 2009, el a eherce su trabou di parlamentario durante 4 aña. E ta consciente cu casi un decada a pasa caba, y cu e lo eherce su trabou como parlamentario diferente cu 10 aña pasa, mirando su experiencia.

El a indica cu ora el a drenta parlamento pa prome biaha, el a asumi e funcion aki cu honor y respet pa tur hende. “Esey ta loke mi lo sigui haci”, el a bisa. Pero igualmente el a declara cu esaki no kiermen cu e lo keda keto. Pues e ta reitera cu e no ta bay keda keto “ora cu mi ta wak cos malo. Mi no ta bay keda keto ora mi ta mira abuso contra hende. Ami no ta bay keda keto tampoco, ora mi ta mira tuma hende haci”.

Sr. Dowers a bisa cu e ta un hende masha habri, trankil y masha bon hende. Pero e no ta acepta traicion di niun hende y tampoco e no ta acepta ora cu un persona ta haci malo cu hende. E por ta respetuoso cu bo, pero no mas leu cu esey, nada di brasamento y menos sunchimento.

Na final di e entrevista aki nos por a mira cu tin cierto herida cu e gobernacion aki a laga atras cerca e mandatario aki, y cu ainda no a cura. “Mi tin un colega of ex colega cu ta den parlamento ma bis’e fei tempo cu e tabata den mi partido, y na momento cu el a traiciona nos bay gobernador bay papia malo di un gobierno, gaña cierto cos na gobernador. Ma bis’e: Ami cu bo ta cla cu otro, bon dia y bon tardi. Esey mi a keda tambe cu ne, pasobra ami no ta den e nivel di traicion. Of ami no ta un hipocrita…” , el a bisa categoricamente.