Conflicto Venezuela – Guyana… No ta nos problema…?

Tin un conflicto serio brotando den nos region. E fin di siman aki, gobierno Venezolano a organiza un referendum nacional, haciendo cinco pregunta na pueblo Venezolano encuanto e conflicto cu e pais bisiña Guyana. Segun medionan di comunicacion ta relata, gobierno a anuncia cu mas di 10 miyon persona a yega na e localnan pa duna nan opinion, loke lo ta algo mas di 50% di e poblacion cu por vota. Solamente un minoria chikito a keda sin aproba e posicion di gobierno. Tin duda cu e cifra ta real ya cu durante henter e dia tabata reina bastante tranquilidad na mayoria di e localnan di encuesta. Di tur manera, tumando na cuenta e control absoluto cu e regimen dictatorial di Nicolas Maduro tin riba henter e proceso, ningun cifra cu nan duna ta di confia. Den e sentido ey ta mas interesante fiha atencion riba otro aspecto y no riba si e publico a duna oido na e yamado di e regimen pa bin duna ‘opinion’.

Mas interesante ta cu e di cinco pregunta haci tabata si hende ta haya cu gobierno mester invadi y anexa e teritorio reclama, y brinda e habitantenan ciudadania Venezolano, y cuminza atende asunto como si fuera teritorio Venezolano. Esaki tambe a haya apoyo masivo, loke ta parce cu gobierno lo usa como un mandato pa por actua. Esaki lo significa automaticamente cu gobierno Venezolano lo bay actua den e sentido aki proximamente? No asina facil, pasobra tin un par di factor pa tuma na cuenta, algun interno y otro externo. Esun interno: con bon forzanan arma ta prepara pa un operacion militar di escala considerable, si e deterioro economico no a toca e poblacion so, sino e capacidad operativo di e cuerponan uniforma tambe. Fuera di esey, ehercito y otro cuerponan uniforma tin solamente ‘experiencia’ den control y opresion contra nan propio poblacion. E factor externo ta cu Guyana no ta para su so. E pais tin acuerdo di proteccion cu Merca y lo por conta tambe cu apoyo di Gran Bretaña, como e pais cu a entrega e teritorio na e actual pais independiente Guyana, na 1966. Por lo tanto mester considera tambe un envolvimento di NATO, di cual tanto Merca como Gran Bretaña ta miembro. Gobierno di Guyana a haci declaracion recientemente caba tocante establecimento di base militar di otro pais dentro di nan teritorio.

Awor, tur esaki por significa cu proximamente tin un guera andando den nos region? No necesariamente, pasobra di ambos banda lo midi e posible consecuencianan. Gobierno di Venezuela lo mester tene cuenta cu e interesnan economico di Estadonan Uni tanto na nan propio pais como na Guyana. Como un prueba di seis luna tin un acuerdo bao di cual e empresa petrolero Chevron ta explota y exporta petroleo Venezolano, loke ta clave pa reactivacion di industia di petroleo Venezolano. Un ataque riba teritorio di Guyana lo resulta den un terminacion inmediato di exportacion di crudo Venezolano pa Merca. Tambe tin interes Mericano grandi den explotacion di crudo riba lama na costa di Guyana pa otro gigante petrolero, ExxonMobil. Riba nivel politico internacional gobierno Chavista lo por conta cu apoyo di su aliadonan di semper, manera Rusia y Iran, pero e pregunta grandi pa nan ta con ta duna asistencia militar riba un distancia asina grandi. Ta parce mas bien cu e asunto aki a surgi como intento interno pa pone adversarionan politico na Venezuela mes bao di presion; un forma barata pa gana apoyo popular. Mayoria di Venezolano di cualkier coriente politico lo ta di acuerdo cu e reclamonan di e republica, cu ta bay back mas cu un siglo caba.

Unda e ta bira nos asunto?

Y kico nos tin di haci cu tur esaki? Nos ta nada mas cu un par di isla chikito den e region aki, cu no kier problema cu ningun hende? E asunto no ta asina simple. Nos ta parti di Reino Hulandes, cu tin frontera cu Venezuela. Reino Hulandes tambe ta miembro di NATO, y ademas Corsou y Aruba ta punto di apoyo logistico pa e vigilancia aereo cu Merca tin den nos region, cu special atencion pa e regimen Chavista. Den caso di un conflicto cu por escala mas aleu nos no ta simplemente ‘innocent bystanders’. Esaki mester preocupa nos? Si, pero tampoco mas cu ta necesario, pasobra di tur manera nos proteccion ta bin di exterior. Sin embargo, tin asunto cu nos por haci mihor pa nos mes. Nos ta mira cu preocupacion cu, bao di e capa di e necesidad di producto Venezolano riba nos mercado local, principalmente di fruta y berdura, ta promociona un apertura di frontera, como si fuera ta un pais normal y no e regimen mas criminal den historia di nos continente. Nos politiconan ta biba bao di tranquera ainda cu nunca bo no ta tende nan papia di e problemanan cu nos mes ta arma pa nos mes, habriendo relacion cu ta trece riesgo grandi pa nos? Nos ta ripara esey caba na e yegada mas frecuente di barco cu migrante, pero cu ta trece tambe arma y droga na nos costa! E poco berdura y fruta ey ta asina valioso cu nos ta dispuesto pa tuma tur e otro peligronan aki acerca, gratuitamente? Y awor ta papia di ferry tambe? Pakico nunca ta papia den parlamento di e asuntonan aki, cu e realismo cu nos ta biba den un mundo cu ta mas grandi cu e isla aki? Cos no a drecha na Venezuela ainda; nos kier otro 15.000 ‘refugiado’ acerca?