ORANJESTAD – A surgi un conflicto serio entre e directiva (colegio di curator) di Universidad di Aruba y e ministro encarga cu Enseñansa, dr. Rudy Lampe. Den e conflicto, cu aparentemente tin algun tempo andando, e colegio di curator a yega na e decision drastico di tuma nan retiro ‘en bloc’. Miembronan cu a retira ta e presidente Juri Nicolaas, hefe di servicio di inteligencia (VDA), y e demas miembronan Miriam Gonzalez (director Banco Central di Aruba), Dolfi Richardson (ex-lato comisario di KPA y actualmente hefe di Seccion Interpol Aruba), Marielsa Arends-Croes (Economista).
Di loke Bon Dia Aruba a haya tende di diferente persona na altura di e asunto, e conflicto ta entre otro tocante nombramento di sucesor den puesto vacante den e directiva aki, aunke otro fuentenan ta papia tocante otro punto di disputa, sin cu a bay mas den detaye di kico ta tratando. Mientras tanto, Gobernador lo a interveni den sentido di mantene aprobacion di e retiro colectivo pendiente, pa por busca un solucion den e conflicto.
Den algun medio digital a trece, banda di e noticia di e conflicto, tambe opinion tocante e papel cu Armand Hessels, presidente di e fundacion pa Gobernacion di Calidad Aruba (FGCA) lo ta hungando den e conflicto aki. Ta señala cu Hessels, den pasado miembro di partido RED, lo tin contacto estrecho cu e mandatario concerni y lo ta ambiciona un posicion den e colegio di curator, igualmente ta menciona Jan de Ruijter como otro persona yega na e ministro cu supuestamente lo tin similar ambicion.
Armand Hessels a reacciona diabierna pasa den un comunicado cu a yega na redaccion di Bon Dia Aruba. Den e edicion aki por lesa e declaracion cu Hessels a haci relaciona cu e asunto, aclarando cu e no tin nada di haci cu e asunto. Den esaki Hessels ta desmenti su envolvimento cu Universidad di Aruba, en todo caso no di e manera divulga pa e medionan. E ta aclara tambe cu e no tin ningun ambicion di fungi den posicion oficial na Universidad di Aruba. Hessels ta envolvi si den un cooperacion entre fundacion FGCA, di cual e ta presidente, y Universidad di Aruba, den temanan relaciona cu bon gobernacion.
E siman aki ta anticipando mas desaroyo den e asunto aki, den sentido di intentonan di intermediacion, mientras cu e mandatario mes tambe lo por atende e asunto aki publicamente.
Nota di redaccion:Pa loke ta e tema di nombramento di miembro di e colegio di curator di Universidad, Bon Dia Aruba a haci algun averiguacion encuanto e stipulacionnan legal cu ta goberna e tema aki. Articulo 7 inciso uno (1) di e ‘Landsverordening Universiteit van Aruba’ ta bisa cu e colegio tin entre minimo cuatro, y maximo ocho miembro. E miembronan ta keda nombra y retira via ‘landsbesluit’ (decreto nacional), riba proposicion di e colegio, cu mester entrega un propuesta di por lo menos dos candidato pa cada puesto vacante cerca e ministro encarga. Seguidamente e nombramento di e persona cu e ministro ta aproba ta keda formalisa den un landsbesluit. Articulo 7 inciso 3 di e Ordenanza encuanto Universidad di Aruba ta stipula cu un curator na final di e aña academico den cual e ta cumpli edad di 65 aña, ta haya retiro, honorabel, a base di un decreto di pais Aruba (Landsbesluit). Esaki ta tira otro luz riba e eventual ambicion di Hessels, manera sugeri pa e medionan referi, pasobra Hessels segun nos informacion a yega caba na edad di 65 aña.
