Un par di dia despues cu InselAir na Corsou a informa cu lo bay kita personal, un grupo di trahadonan na Aruba a dicidi di para trabou. Cuanto hende exactamente no ta conoci ainda.
Bon Dia Aruba a keda pendiente ayera atardi pa mas informacion di parti di Chief Maintenance Officer Stephan van Spaandonk, pero e no kier bisa nada mas cu e trahadonan a stop di traha pa motibo cu nan no a ricibi nan salario ainda. E noticia a bin riba e dia cu departamento di impuesto SIA a duna un conferencia na prensa pa aclaria e situacion di e aerolinea como cu siman pasa mester a tuma luga e findishi di e inventario di e oficina di InselAir Aruba. E tabata trata di mueble y pickupnan, pero no nan avionnan. Sinembargo riba e prome dia di e findishi, a bira conoci cu e departamento a para esaki. Ayera e director Louanne Gomez-Pieters ta splica cu nan a confisca e cuentanan bancario di InselAir pa motibo di un debe di belasting.
Sinembargo nan a dicidi di lanta e ‘beslag’ riba e cuentanan y para e findishi despues cu a yega na palabracionnan cu e accionistanan di e aerolinea. Segun SIA awor lo duna e compania e espacio necesario pa drecha su operacion y por paga su trahadonan y tambe e debe atrasa. Asina nan por continua riba nan plan di rescate y tambe e areglo di pago pa diferente impuesto manera BBO/BAZV, loonbelasting. No ta prome biaha cu e departamento a yega na un areglo pa pago di impuesto y primanan atrasa cu InselAir. Aña pasa ya nan tabatin un areglo, pero na dado momento InselAir a drenta un problema financiero nobo como cu Departamento di Aviacion Civil di Aruba a dicidi di ground e flota di avion na Aruba. Asina e compania e perde miyones. Segun e ultimo informacion di nan mes, nan a perde 12 miyon dollar den e prome kwartaal di e aña aki.
Bon Dia Aruba lo sigui riba e situacion laboral.
