Yegando fin di siman, a surgi e noticia di e conflicto entre directiva di Universidad di Aruba y e actual ministro encarga cu enseñansa. Den e noticia unda ta relata cu e directiva den su totalidad a ofrece nan retiro, tambe tabatin opinion tocante e papel cu e presidente di un fundacion pa bon gobernacion lo ta hungando den e conflicto aki. E persona a reacciona diabierna pasa den un comunicado cu a keda publica den e edicion aki, banda di un articulo cu e echonan principal manera nos redaccion a recoge nan te awor.
E pregunta actual ta naturalmente kico ta realmente e problema. Tin un conflicto entre e ministro encarga cu enseñansa y e directiva di e universidad, cu ta concentra alrededor di nombramento di miembro nobo di e ‘college van curatoren’. Esaki riba su mes no mester haci e conflicto inmediatamente un guera ‘all out’; mas bien tur dos banda tin e responsabilidad y obligacion di canalisa nan diferencia di opinion di tal manera cu ta keda mantene un situacion manehabel. Obviamente den e caso aki ya a yega asina leu cu e directiva kier a duna un señal colectivo di alarma, di disputa no manehabel mas.
Si e punto di conflicto principal ta nombramento di miembro nobo, nos ta haya esey straño pasobra tin un procedimento bastante cera stipula den e ley cu ta goberna universidad, como institucion funda pa gobierno a traves di un ley (Landsverordening Universiteit van Aruba). Kico esaki ta bisa? Cu universidad tin un colegio di curator, cu ta consisti di por lo menos cuatro y maximalmente ocho miembro. Ta nombra (y retira) e miembronan a traves di un ‘landsbesluit’ y e periodo di miembresia ta pa cuatro aña. E colegio di curator ta haci un proposicion pa cada puesto cu bira vacante, di por lo menos dos nomber.
Kico esaki ta implica? Cu e escogencia final ta di e mandatario concerni, cu lo laga prepara e landsbesluit pa firma hunto cu Gobernador. Loke e ministro no por haci ta laga nombra un persona cu no ta contempla den e propuesta di e colegio. E por laga traha un tal landsbesluit pero cu lo logra tambe cu gobernador ta firma esaki tambe, ta otro asunto. Sin embargo, e ministro por bisa cu ningun di e personanan proponi ta di su agrado y cu e ta desea un ‘voordracht’ nobo. E directiva no por haci nada otro cu cumpli cu e peticion aki.
Y tin algo mas. Si e colegio no ta cumpli cu e peticion, o di cualkier forma no ta contribui na buena marcha di e directiva, proponiendo persona cu ta haya aprobacion di e ministro, por yega na un punto unda e ministro concerni por bay actua pa logra nombramento di un colegio cu e minimo cu ley ta rekeri, esta cuatro persona, pasobra finalmente e ta esun responsabel politicamente pa bon administracion di e universidad. Y bon administracion no ta sirbi cu laga puesto vacante keda existi pa hopi tempo.
Pa loke ta e retiro ‘en bloc’ of no di e miembronan, esaki no ta parce e forma mas sensato di hiba un conflicto cu un mandatario. Pakico no simplemente ta duna di conoce cu tin un disputa cu e mandatario y kico ta e conflicto? Si e colegio tabata kier a pone e ministro den un posicion dificil, unda e mester duna oido na loke nan ta desea, anto bo no mester cuminsa cu pone bo mes ‘offside’ di biaha, mediante un retiro boluntario cu ta ireversibel. E mandatario por simplemente acepta e retiro y cuminsa e tramite pa nombra un directiva nobo. Aki nos ta papia di un situacion unico pasobra no tin colegio di curator pa haci propuesta. Esaki ta implica cu mester bolbe na e situacion inicial, unda cu e nivel politico di e tempo ey a acerca persona pa bira curator y a nombra nan manera ley ta prescribi. Desde e momento ey ta sigui e ley atrobe, cu ta stipula cu pa e puestonan vacante cu surgi despues, atrobe e colegio tin cu haci propuesta na ministro.
Contrario cu loke ta pinta den medionan di comunicacion, e mandatario no ta esun cu ta para debilita den e asunto aki, huridicamente. Loke si por ta un punto negativo cu posibel candidato lo pensa bon prome nan bay di acuerdo cu nombramento den e situacion conflictivo aki. Y di mes caba e grupo di persona cu tin e educacion y experiencia pa fungi den e tipo di trabao di maneho aki no ta asina grandi. Di e banda ey ta recomendabel pa e ministro anda cu cautela. Aceptacion publico ta depende grandemente di e seriedad y experiencia di e personanan nombra.
Sin embargo, ta surgi e pregunta kico a bay robes den e comunicacion cu e mandatario, pa yega na proposicion di persona cu e ministro kier/por acepta. Al fin y al cabo, ta e mester dicidi, y no e colegio. Esaki por parce duro pa acepta pa e colegio, pero e independencia di e universidad no ta bay asina leu cu ta e directiva ta dicidi. Si tin otro obhecion contra e manera di maneha di e ministro, esey lo mester bin dilanti ainda. Te awor nos no a tende nan.
