Recientemente varios medio di comunicacion local a publica informacion tocante un caso na unda Gobierno di Aruba a tuma decision di trece tur pashent Arubiano cu tabata ricibi tratamento psikiatrico na facilidad “Corporacion con Animo” na Colombia. E noticia aki no cay den bon tera pa e facilidad cu a entama un caso contra Gobierno di Aruba.
Segun e noticiero local, NoticiaCla a reporta, minister encarga cu Asuntonan Social, Rocco Tjon a indica na e noticiero cu a tuma e decision aki na bienestar di e pashentnan cu ta na Colombia.
“Na bienestar di nos clientenan, mi persona, a traves di conseho cu mi a ricibi di ‘indicatiecommissie’, e mesun commissie cu na prome instancia a conseha pa manda nos clientenan ‘Corporacion con Animo’, a dicidi di trece nan back y sigui duna e cuido na Aruba of Corsou,” e mandatario a indica na e noticiero local.
Segun e mandatario a sigui splica, e comision cu a duna e conseho pa trece e pashentnan back ta consisti di profesionalnan di GGZ basico y GGZ specialisa y a indica cu cada cliente tin un plan di cuido traha.
Despues di e anuncio di Gobierno di Aruba pa trece e pashentnan back, ‘Corporacion con Animo’ a puntra corte pa un ordemaatregel, un medida disciplinario pa para cualkier accion di gobierno temporalmente. Minister Tjon a indica cu e medida aki a wordo rechasa pa hues y aworaki e partinan ta en espera di un fecha pa e caso wordo trata den corte.
Segun e noticiero local ta reporta e facilidad en cuestion a tuma e paso pa hiba Gobierno di Aruba corte pa asina evita cu e pashentnan cu ta ricibiendo tratamento na un finca na Colombia mester regresa Aruba. Segun informacion, ‘Corporacion con Animo’ a busca asistencia legal di e abogado local Doris Canwood.
Na 2018 minister di Turismo y Salud, Dangui Oduber, a anuncia cu gobierno a firma un convenio cu ‘Corporacion con Animo’. E tempo ey ora cu a firma e convenio minister Oduber a indica cu e intencion di e director di e facilidad ora el bishita Aruba tabata pa bin cu un centro na Aruba mes, intencion cu gobierno a ricibi cu man habri.
