Un ‘suicide bomber’ a lansa un atake den e capital di Siria, informenan ta bisa cu por lo menos 19 persona a muri. Polis di Siria a persigui 3 presunto terorista cu a purba di drenta e capital. Polis a detene y a desactiva bomnan den dos di e vehiculonan, pero e di 3 chauffeur a drenta plaza Tahrir y a explota e bom. Siria ta memey di un guera civil ya pa 6 aña caba y Damasco ainda ta bou di control gubernamental.
Por lo menos 12 persona a resulta herida den e explosion Diadomingo segun informenan. Television di e estado ta bisa cu e teroristanan a plania pa bombardia areanan yena cu hende ariba e prome dia laboral despues di e luna mas sagrado musulman di Ramadan. Un funcionario di polis pa e agencia di noticia estatal a bisa, “E atentadonan terorista a mata y herida varios civil y causa daño fisico den e area.” Un residente a bisa cu nan a scucha zonidonan di tiro rond di 6 di atardi, despues sigui pa un explosion cu a destrui bentananan di casnan den e vecindario. Un coresponsal di e AFB na e sitio a wak varios daño extenso den edificionan cerca y dos auto bombardia banda di e plaza. Segun e medio di comunicacion Reuters, e ministerio di relacionnan di exterior di Siria a manda un carta bisando cu te cu 20 persona a muri y algun dozijn di muhe y mucha tabata entre e heridonan. Te ainda niun Grupo a bin dilanti y tuma responsabilidad pa e atake.
Mas di 300.000 persona a perde nan bida den e guera di Siria, cual a cuminsa cu un protesta anti gobierno na aña 2011. E agencia di Nacionnan Uni pa refugiadonan a bisa cu desde e comienso di e conflicto, 5.5 miyon persona a bandona e pais, y otro 6.3 miyon persona a wordo desplasa. Damasco a permanece principalmente bou di control di presidente Bashar al-Assad, y a evita gran parti di e lucha pero e capital a experencia un serie di atake suicida cu bom. Na maart, dos atentado cu bom na e capital a mata mas o menos 40 persona. Un grupo jihadista afilia cu Al Qaeda a tuma responsabilidad pa e atake aki.
