Dialuna ultimo a lanta cu un noticia sensacionalista ‘too good to be true’ den algun medio di comunicacion, intimamente liga na gobierno. Segun e noticia aki, e ministro encarga cu turismo lo ta na punto di bandona partido berde pa lanta su mes partido. Tur cos lo ta cla, hasta a scoge color caba. Si e intencion tabata pa lanta reaccion den pueblo, por bisa cu e tabata un fracaso grandi. Ken realmente a tuma e cos aki na serio? E unico reaccion practicamente tabata di e doño di e corant cu den un editorial ayera a desautorisa su redactor responsabel pa saca e tipo di informacion aki.
E pregunta cu a keda ta kico lo por ta e proposito di henter e chasco aki. Ta dificil pa kere cu ta e ministro en cuestion mes a entama e cos aki, y mucho menos via un reportero cu no mucho tempo atras a perde su trabao pa motibo di cosnan publica tocante e ministro, pero cu a haya su puesto atrobe despues cu maximo dirigencia di e corant y esun di e partido a yega na un acuerdo.
E impresion ta cu a subestima inteligencia di hende. Nos tur a presencia e conflicto na januari di e aña aki, unda e ministro di turismo tabata esun cu a ‘gaña muri pa wak ken ta yora’. El a ripara cu no tabatin suficiente yoramento y a staciona su eventual plannan pa bay riba su mes. Awor, ken ta bay kere cu diripiente, seis luna despues, e ta bolbe sali sondea e apoyo cu e por haya pa lanta su mes partido? Pregunta ta keda kico tabata e motibo pa divulga e noticia aki, pero mester considera di otro banda cu e no ta di suficiente peso pa dedica mas atencion.
Nos ta kere cu ta miho pone atencion riba e problemanan real cu e gobierno tin. Den esey nada no a cambia. Tin riba mesa e asunto di e ley di all-inclusive, unda e ministro concerni a haya tur apoyo di Prome Ministro y su coleganan, por lo menos esey ta loke Prome Ministro a bisa. Si nan tin un fraccion di e conocemento cu nan diplomanan ta representa, nan mester por sa cu despues di pasa e ley aki, e sector hotelero lo no sinta keto. E problema ta bira caba, manera den caso di tur ley, ken ta bay controla, y kico nan ta bay controla?
Ehemplo: si un hotel all-inclusive ofrece tur su clientenan algun voucher pa bay come gratis den restaurant pafo di e resort, nan ta all-inclusive ainda? Por observa cu e cambio di ley aki no a propone ningun cambio den e articulonan cu ta concerni supervision y sancion. Den su memoria di splicacion tampoco no tin un palabra dedica na supervision. Esey lo significa cu e ministro encarga cu turismo tin algo di bisa den otorgamento di e permiso pa all-inclusive, pero no tin nada regla pa cu supervision y/o sancion di su banda. Manera e ley ta awor, tur supervision ta keda na e ministro encarga cu Salubridad Publico. Tampoco a cambia algo na e castigonan cu por impone bao di e ley aki. Si bo por duna maximalmente un multa di mil florin pa duna informacion incorecto (articulo 57 Vergunningsverordening), talbes e doño di hotel no ta muri di hari, pero e lo no muri di miedo tampoco.
Ademas ta surgi e pregunta cu cual personal e ministro di Salubridad Publico ta bay controla buki di hotel pa comproba cu nan ta cumpli cu ley. Te awor e tin hende pa controla higiena, pero lo mester aumenta e staf di inspeccion pa por cumpli cu e tarea nobo aki. Y, un biaha mas, e ley manera e ta awor no ta duna e ministro encarga cu turismo ningun poder pa eherce control. Cu ainda e no kier comprende pakico Conseho Consultivo, pa su mes bon, a recomenda pa no manda e proyecto di ley aki pa Parlamento mes, nos no ta comprende…
Otro dolor di cabes cu gobierno tin ta presupuesto 2017. Na e momento aki, luna di juli ta terminando y nada a yega Conseho Consultivo ainda. Esey ta significa cu, a menos cu un milagro sucede, presupuesto no por yega Parlamento prome cu 1 di september. Tin varios problema cu lo aumenta gasto otro aña, entre otro husticia (combatimento di delincuencia), mientras cu mester baha gasto pa yega na 0,5% di deficit so.
E refineria ta otro problema. Gobierno a core ‘seal the deal’ cu Citgo (Aruba), pero awor mester logra cera e deal ainda cu Valero, cu ta propietario legitimo di tur e instalacionnan. Tin indicacion cu por lo pronto no tin un acuerdo final cu Valero y tin pendiente tambe e asunto di financiamento di e rehabilitacion pa cual mester busca recurso externo, sino nada ta bay move. A keda otro ‘time bomb’: e registracion di partner, tambe pa pareha di mesun sexo, den Codigo Civil, cu opinion contradictorio den fraccion di gobierno. Por ta cu e ‘conflicto’ cu ministro di turismo ta simplemente un cortina di huma?
