E reunion di intercambio di idea encuanto bon gobernacion y integridad mester tabata uno exclusivamente informativo pero, cierto momento Ricardo Croes di RED a acusa Prome Minister di tin familiar y amigo ta traha cune na Bestuurskantoor y a mustra su disgusto cu a usa Rudy Lampe como ehempel di un hende cu kier a kibra regla, den e caso aki riba tereno di Cannabis.

Croes a mustra cu no ta minister Lampe ta bao investigacion. Ademas, Croes a papia di un grabacion di un persona cu ta bisa di a reuni cu Prome Minister Wever Croes pa regla e negoshi di cannabis medicinal. Prome Minister Evelyn Wever Croes a sigura cu e no ta dicidi riba e tema, y cu aunke e por reuni cu hende, ningun por atribui ningun decision na su persona pasobra ta un asunto di Minister Dangui Oduber y Minister Xiomara Maduro. Ricardo Croes a sigura cu e lo no kibra su palabra y lo sigui sostene e coalicion pero e ta lamenta cu e no ta haya e mesun trato.

E ta lamenta cu ta mete den cartera di Minister Lampe, algo cu tambe ta contra integridad den su concepto. Su comentarionan a produci preguntanan di miembronan di fraccion di MEP cu a puntra dicon RED ta sigui sostene locual Croes mes ta considera actonan no-integro, pues cu si esey mes ta e caso, Ricardo Croes ta mes culpabel.

Asina a bin diferente punto y pregunta dilanti, unda oposicion particularmente tabata cuestiona e argumentonan.

E otro momento yamativo tabata ora cu parlamentario Mike de Meza a keha cu Presidente di Parlamento Thijsen a duna Hendrik Tevreden mas minuut pa hiba su discurso. Despues di tres advertencia, Thijsen a dicidi pa yama polis pa escolta De Meza for di sala y edificio di Parlamento.

Esaki basa riba articulo 38 di Reglamento di Ordo di Parlamento.

Mester bisa cu tambe tabata inusual cu e propio Presidente di Parlamento despues a hiba un discurso riba e importancia di integridad unda e mes a lanza algun pregunta. Segun articulo 7 di Reglamento di Ordo di Parlamento, si Presidente di Parlamento kier hiba palabra, e mester laga otro dirigi e reunion riba e tema specifico y no por dirigi e reunion riba e tema mas.