Presidente di Peru, Martin Vizcarra a anuncia ayera e prome caso di coronavirus na e pais y a sigura cu e estado no lo disminui recursonan pa combati e epidemia aki, cu a extende rond di mundo. Ta trata di un homber di 25 aña, cu ta stabiel y cu recientemente a biaha pa Spaña, Francia y Republica Checo.
E mandatario a haci e anuncio desde palacio di Gobierno den un pronunciamento pa prensa, tabata acompaña di minister di Salud, Elizabeth Hinostroza.
“Awe mi mester confirma cu den oranan di marduga a confirma e prome caso di infeccion cu coronavirus COVID-19 na nos pais. Ta un pashent homber di 25 aña di edad cu antecedente cu a biaha pa Spaña, Francia y Republica Checo,” e hefe di Estado a detaya.
Despues di recorda cu e virus a yega na paisnan Sur Americano como Brasil, Ecuador, Chile y Argentina, Vizcarra a pidi ‘trankilidad’ pa e Peruanonan y a bisa cu a tuma ‘tur e medida desde e punto di bista medico, pa e pashent, cu ta stabiel, conta cu un atencion integral’.
Dianan pasa, autoridadnan a habilita varios area pa aislamento den cinco hospital di Lima pa atende pashentnan eventual cu coronavirus. A coloca puesto sanitario na aeropuerto internacional Jorge Chavez y na algun waf maritimo, como El Callao.
