Confiansa di e consumidor a baha den e di tres trimester di 2016 segun e ultimo resultadonan di e Encuesta di Confiansa di Consumidor (CCS) di Banco Central di Aruba (BCA).
Esaki ta informacion for di un relato di Banco Central.
E Indice di Confiansa di Consumidor a cera na 96,0 pa e di tres trimester di 2016, un empeoracion di 0,8 punto di indice compara cu e trimester anterior. Un subida den incertidumbre pa futuro ta probablemente e factor principal afectando e confiansa di consumidor.
Tur e elementonan principal di e indice di confiansa di consumidor a deteriora. Consumidornan a evalua e situacion actual un poco mas negativo compara cu seis luna pasa ya cu e Indice di Situacion Actual a cay cu 0,5 punto di indice te na 94,8. Alabes, e expectativanan di consumidor tabata mas abou: e Indice di Expectativanan a empeora di 100,2 te na 99,6, yegando bek na un resultado pesimista despues di a bira optimista den e periodo anterior.
Menos positivo riba financia
Consumidornan tabata tambe menos optimista riba e futuro cercano den e di tres trimester di 2016. E grupo di consumidornan cu ta spera cu nan condicionnan financiero personal lo mehora a cay di 37,0 % te na 35,1 %. Di otro banda, tabata tin un mehoracion den nan sentimentonan di, respectivamente, condicionnan di negoshi pa futuro (di 29,8 % te na 34,7 %) tambe den e posicion financiero di gobierno pa futuro (di 21,8 % te na 29,8 %). Esaki por ta relata na e efectonan di e reapertura di e refineria pa futuro.
Empeoracion financia gobierno
Sinembargo, ainda tin mas consumidor (32,8 %) cu ta anticipa un empeoracion den financia di gobierno. E percepcion di condicionnan laboral di consumidornan pa futuro a baha, ya cu 44,9 % di e respondientenan a indica cu expectativanan pa haya un trabou den futuro lo empeora (un subida di 4,9 punto di porcentahe). Tin cu nota cu 14,3 % a contesta cu nan no sa e expectativanan pa cu condicionnan di mercado laboral, cual ta e resultado mas halto desde e comienso di e CCS. Esaki por ta un señal cu tin incertidumbre rond di e mercado laboral.
Ademas, e indicenan di expectativa di prijs y custumber di compra di consumidor a empeora den di tres trimester. E Indice di Expectativanan di Prijs a baha te na 90,7 den e trimester bou repaso. A pesar di tendencianan deflacionario, e porcion di consumidornan indicando cu prijsnan lo ta mas halto den e siguiente seis luna a subi di 65,5 % te na 73,5 %. Finalmente, mayoria di consumidornan a indica cu no tabata apropia pa cumpra un auto (64,8 %), aparato grandi (49,0 %), haci un prestamo (70,8 %) of un hipoteca (76,8 %). Adicionalmente, maske tin un crecemento consistente den hipoteca, solamente 7,3 % a indica cu ta apropia pa haci un hipoteca, e resultado mas abou desde e comienso di e encuesta.
