Den e rush pa reemplasa mashin di votacion electronico no confiabel despues di interferencia Ruso den eleccion presidencial 2016 na Merca, oficialnan local y estatal a core pa adkiri ekipo mas confiabel pa eleccion e aña aki, na momento cu agencianan di inteligencia ta teme problemanan pio.
Pero na luga di scoge papeleta simpel marca na man, cu ta mas resistente pa manipulacion pasobra no por hack papel, hopi di nan ta opta pa tecnologia caro cu expertonan di siguridad ta considera un riesgo casi igual na e anterior sistemanan electronico desacredita.
Yama ‘aparato di marca voto’, e mashinnan tin touchscreen pa registra escogencia di e votado. A diferencia di mashin cu tin unicamente touchscreen, nan ta print record di papel cu lector optico ta lesa.
E solucion mas caro disponibel, nan ta sikiera dobel mas caro cu opcion di papeleta marca na man. Nan ta promovi vigorosamente pa tres bendedo di ekipo di votacion cu ta controla 88% di mercado Mericano.
Algun di e aparatonan di marca voto mas popular, traha pa lidernan di industria Election Systems & Software y Dominion Voting Systems, ta registra votonan den codigo di bara cu wowo humano no por decifra. Segun investigadonan, esaki ta un problema: Votadonan por resulta cu papel cu adecuadamente ta bisa e nomber di e candidato cu nan a scoge, pero pa motibo di un hack, e codigo di bara no ta refleha e escogencia ey. Pasobra e codigo di bara ta locual ta conta, votadonan nunca lo sa cu nan voto a beneficia otro candidato.
Hasta riba mashin cu no ta usa codigo di bara, votadonan por no ripara si un eror di programacion of hacking a afecta nan escogencia. Un estudio di Universidad di Michigan a determina cu apenas 7% di participantenan den un simulacro di eleccion a notifica trahadonan di e votacion ora e nomber riba nan recibo no tabata esun di e candidato pa ken nan a vota.
Aparatonan pa conta voto no a ser crea como herment primario pa vota, sino un opcion accesibel pa persona cu discapacidad. Criticonan ta mira nan como vulnerabel pa hacking. Na convencion di hacker DefCon na Las Vegas aña pasa, hackernan na ‘Voting Village’ tabatin mester di menos di ocho ora pa hack dos mashin antiguo di conta voto.
Ademas di hacking, e aparatonan tambe por sufri problemanan tecnico, y por conduci na rijnan mas largo, potencialmente reduciendo asistencia. Votadonan tin mester di mas tempo pa haci nan voto y e costo halto di e mashinnan ta pone oficialnan di eleccion pa limita cuanto nan ta cumpra.
Cantidad di experto ta kere cu e aparato di conta voto awendia ta socava a mero idea di retene un record di papel cu por usa pa auditoria y recuento. Ta un idea apoya pa un reporte na 2018 di Academianan Nacional di Ciencia cu ta faborece papeleta marca na man conta pa scanner optico. Alrededor di 70 porciento di votadonan Mericano a usa nan den ultimo dos eleccion presidencial y lo hacie atrobe na november.
Ademas, industria di mashin di votacion ta virtualmente sin regulacion, maske e tecnologia a ser designa un infrastructura critico na januari 2017. Guianan di certificacion federal pa diseño di mashin di votacion ta 15 aña bieu y boluntario. E bendedonan lider a resisti di revela publicamente test di penetracion di terceros den nan sistema.
Na Aruba a propone e uso di mashin di voto na 2018. Inicialmente a propone cu lo introduci votacion electronico pero lo keda cu papeleta pa controla. Den un relato di Bon Dia Aruba dia 6 di augustus 2019, titula ‘Gabinete Wever-Croes: votacion electronico lo garantisa transparencia y integridad’, prome minister Evelyn Wever-Croes a declara cu ‘votacion electronico ta garantisa transparencia y integridad den nos sistema di votacion’. Semper agregando cu e papeleta lo keda pa control.
Riba e tema aki, dia 10 di augustus 2019 Bon Dia Aruba den su Editorial ta cuestiona pa ki motibo ta duna e introduccion di mashin di votacion un prioridad, principalmente tumando na cuenta e prijs halto di e mashin di votacion: “Riba e criterio aki caba, di problema urgente cu ta sclama pa mehoracion, e proyecto di votacion electronico no ta score halto. Manera bisa anteriormente, ‘if it ain’t broke, don’t fix it’. No tin problema urgente cu a surgi den e ultimo eleccionnan cu ta haci cu nos mester duna prioridad na esun aki. Esey sin kita merito di eventual beneficio cu e por tin; ta bay cu den e situacion financiero actual, nos mester sa bon unda nos ta gasta e tiki placa cu tin.”
Por lesa tur articulo di Bon Dia Aruba relaciona cu mashin di votacion electronico bishitando nos website bondia.com of scan e QR code adhunto.
