Despues di dos aña, ayera mainta e di dos version di Heath Care Conference Aruba (HCCA) a inicia na Hilton Hotel. Pareu cu e conferencia aki ta tuma luga un expo.
HCCA a conta banda di oficialnan locual cu presencia di e ministernan di Salubridad Publico di Corsou y St. Maarten. Esaki ta e prome biahe oficial tambe di Carmelita Römer despues cu el a huramenta recientemente como minister di Salud di e Gabinete Rhuggenaath I na Corsou.
Inspector general di salubridad publico, Earl Best a fungi como MC. El a pone enfasis riba varios topico interesante cu ta demanda un necesidad di cambio y atencion riba tereno di salubridad publico, entre nan: cobertura universal di salud, sostenibilidad financiero di cuido di salud, costo versus calidad di salud, aumento di pashentnan cu diabetes cronico y logicamente avance tecnologico riba tereno di salud.
Minister di Salud Alex Schwengle ta haya cu e conferencia aki sin duda tin su balor y e ta creciendo. P’esey el a priminti su mes cu lo continua cu e conferencia aki, ya sea como minister of no. “Ma haci un promesa na mi mes y na e comunidad cu ta bin, cu lo mi bay keda organisa e conferencia aki cu mi ta minister of no. Pero ami ta tracker mas cu mi pechi profesional cu mi ta tracker cu mi pechi politico”.
El a indica cu ta resulta dificil pe competi den e mundo politico, ya cu e ta hibando un maneho diferente. E ta spera cu den e tres luna proximo aki, kiermen den pleno temporada prome cu eleccion di dia 22 di september venidero, e por duna un imagen di e trabou cu nan tur ta haciendo, no na termino corto so sino na termino largo.
Talbes e ta haya cu e pueblo no ta mira cambio inmediatamente; pero e ta indica cu e tipo di cambio structura riba e tereno di salud, no ta bin lihe. “E ganashi cu ta bay bin, ta bin ariba termino. Nos problema cu nos tin hopi grandi ta e problema structural y problema structural bo no ta cambia nan den un dia.”
Desaroyo di HCCA
Tin varios diferencia entre HCCA 2015 y esun di 2017. E prome version a wordo organisa bou peticion di IPKO (Parlamento di Reino Hulandes) y e conferencia regional aki a haya di biaha un gran interes y acogida. Mas cu 330 persona cu relacion directo (entre nan 50 dokter) of indirecto cu ta traha riba tereno di salud publico a participa. Pero tambe politiconan y funcionarionan envolvi den maneho di salubridad publico. E prome biaha, nan a pone mas atencion riba e tema di colaboracion na nivel di e partnernan di reino.
E biaha aki, HCCA 2017 ta un iniciativa di minister Schwengle pa duna continuidad na loke a keda sembra dos aña pasa. E cantidad di participante a bira mas grandi casi 400, entre nan mas cu 100 dokter tanto local como di afo; y e tema tin di haber mas tanto riba cuido integral.
Minister Schwengle ta cualifica e conferencia aki como uno profesional y importante, unda e ta esun cu ta haci e tracker pa e tres grupo, tanto profesionalnan, politiconan y funcionario envolvi den maneho traha mas hunto riba futuro di salubridad. “Antes nos tabata mucho separa, mucho pleitamento, mucho puntamento di dede, tur hende ta señala otro, y niun hende ta carga e responsabilidad y traha duro pa bay dilanti.”
E mandatario a declara na Bon Dia Aruba cu e conferencia aki ta pone atencion na e aspecto di cuido integral di salud, ya cu e ta un di e temanan mas importante awendia di Nacionnan Uni (ONU), pero tambe di Organisacion Mundial di Salud (WHO). P’esey e conferencia aki a conta como oradonan invita cu Malhi Cho kende ta consehero di PAHO/WHO riba sistema y servicio di salud pa e region Caribense, specialmente di e islanan di Reino Hulandes; y Venezuela
E motibo tras di e vision di e organismonan internacional aki ta cu si e sectornan salud ta traha di un manera mas integral, ta nifica cu nan lo por logra hopi mas. Kiermen si tur persona ya sea profesional of envolvi den maneho ta traha riba e mesun plataforma, vision, direccion y plan strategico. Esaki ta trece cu ne mas unidad, menos tempo y placa perdi; y efectividad lo ta superior, segun e mandatario. El a bisa cu tin hopi ehempel di esey den mundo internacional cu durante e conferencia nan a lo bay pasa riba nan.
Finalmente minister Schwengle ta haya cu e conferencia aki ta un forma di aporta pa trece mas coherencia di e manera con nan por traha pa comunidad.
