Conferencia riba Zika: 44 caso y ta costa Aruba miyones

E conferencia riba Zika diamars anochi tabata hopi bon atendi. Un sala yen na Renaissance Convention Center, cu trahadonan den sector medico – dokter di cas, specialista, partera, cuidado, experto di lab – y hopi mas interesado a scucha charlanan di diferente virologo y otro specialista riba tereno di investigacion medico, testnan, ginecologico y epidemiologia. Tabatin hopi topico interesante treci dilanti. Bon Dia tabata presente y lo publica varios articulo y video riba e topiconan.
 

E puntonan remarcabel treci dilanti riba e conferencia ta:

– Aruba tin mas o menos 44 caso di Zika, segun Maribel Tromp, hefe di Departamento di Epidemiologia y Investigacion di Departamento di Salubridad Publico (Despa). E ta splica Bon Dia cu berdad tin 11 caso confirma a base di testnan. Pero nan ta calcula cu tin 4 biaha mas caso pasobra di cada 4 hende solamente 1 ta acudi na dokter. Esaki tin di haber cu e sintomanan di Zika ta leve y hende ta kere cu enbes di e virus nan tin por ehempel griep.

– Den su presentacion sra. Tromp a menciona e ultimo cifra di World Bank pa cu e impacto di Zika riba economia.  Paisnan cu ta depende hopi riba turismo, por spera un peridida di 1% di nan GDP. “Pa Aruba esaki lo por nifica miyones menos”, segun sra. Tromp. Esaki sin tene cuenta cu crecemento di gastonan pa AZV. Y si tin suficiente prueba cu Zika realmente ta causa microcefalia bou baby, mester hinca hopi placa tambe den un infrastructura pa cuida e babynan incapacita. Y ya pa awor ta pidi pa mas cen pa inverti den e investigacion y testnan pasobra nan ta nesesario.

– Mester haci hopi mas investigacion y testnan pa constata cuanto Zika tin y kico e efectonan exacto tin pa nos salud. Esaki lo tuma su tempo (añanan) y p’esey medidanan di prevencion awor ta e miho remedi. E virologo conoci Byron Martina (trahando na e centro medico Hulandes Erasmus, naci na Corsou) tambe a presenta y a anuncia cu lo haci 3 investigacion unda Corsou ta participa y ta spera cu otro pais Caribense den Reino, manera Aruba lo participa. Tin ayudo financiero di Union Europeo pero mester mas fondo. Bon Dia 24 lo publica videonan di e entrevista cu sr. Martina entre otro riba e topico aki.

– Den diferente charla a menciona cu  Zika ta haya asina hopi atencion cu por bisa hasta cu a bira un ‘hype’. E virus ta similar cu esunnan di Dengue, Chikungunya, West Nile (Aruba ainda no tin esaki, pero ta premira cu lo bin), hasta Malaria. Pero e efecto di e otro virusnan riba nos salud, ta mas grave. = Dengue siguramente pasobra e por ta fatal. Pues durante e conferencia a enfatisa cu no mester lubida cu e combatimento di e otro virusnan ta keda importante y duna Zika tur atencion pasobra ta algo nobo awor.

– Tin un problema grandi pa detecta ki virus un persona tin. Por ehempel si bo a haya un vacuna contra gele koorts den pasado y mester haci un test pa Zika, esaki bruha e resultado. Den e caso e analista no sa di e vacuna ey, e por conclui cu bo tin Zika of un di e otro virusnan manera Dengue Chikungunya of West Nile, cu tur ta cay den e famia di Flavi virus.

-Ta necesario pa Aruba mes por  haci test di Zika enbes di manda esaki pa Hulanda, pa asina por yuda e pashent mas lihe pero tambe limita contaminacion. Pero te ainda no tin fondo poni desponibel, ni di parti di gobierno.

– Aruba lo haya su epidemia di Zika. Pero esaki tambe tin di haber con ta midi esaki.  Na Aruba te awor nunca tabatin caso aunke e virus a keda descubri na 1947 na Africa. Di biaha nos isla tin un crecemento di 0 pa 44.  Segun Maribel Tromp esey ta haci cu segun nan calculacion Aruba lo enfrenta un epidemia. No por compara e cantidad aki cu e casonan di Dengue, pasobra Aruba pa basta aña tin hopi caso di Dengue caba. Pues mester un crecemento di casonan di Dengue mas significante pa por papia di un epidimia atrobe. E general  Aruba den e ultimo 3 aña no tin hopi caso di Dengue pa motibo di El Niño cu ta haci cu nos isla ta hopi seco y e cantidad di sangura ta abou.

– Por lo pronto lo introduci e protocol nacional pa hende muhe na estado, cu lo encera test adicional pa esunnan cu ta spera baby. Ora un persona ta haya Zika, e ta keda cu e virus pa semper pero e no ta activo mas despues di un periodo. Pues un muhe cu a haya e virus riba edad jong, no por transimiti esaki añanan despues ora e ta na estado. Sinembargo mester mas investigacion pa exclui esaki.

– Tin cooperacion entre e paisnan den Reino: Aruba a adopta e protocol nacional pa hende muhe na estado di Corsou y Boneiro esun di Aruba pa cu e accion di swipe. Pero riba e conferencia di Zika a remarca cu ainda e colaboracion den Reino por ta hopi mas pa combati e virusnan.