Conferencia Episcopal Venezolano (CEV) a pronuncia dialuna pasa su rechaso di eleccion presidencial convoca pa Asamblea Nacional Constituyente (ANC) pa tuma lugar prome cu fin di april proximo.
“Nos ta dilanti un hecho di extralimitacion y desnaturalisacion di e funcion di ANC. Nos tin un Constitucion Nacional y algun ley cu ta stipula claramente e procedimento di eleccion. Senciyamente, ta desconoce y omiti e disposicionnan ey, pa legisla segun e interesnan propio di e poder”, e comunicado ta bisa. Demostracion di esaki ta e mandato duna na Conseho Nacional Electoral (CNE) di parti di ANC pa convoca eleccion presidencial adelanta, cu ta bay contra e cuadro legal vigente.
E obisponan ta insisti cu e ANC ta inconstitucional y ilegitimo den su origen y su desempeño. “Envez di limita su mes na redacta un Constitucion nobo, e ta pretende di lanta como un suprapoder cu funcionnan ehecutivo y hudicial”, e texto ta bisa.
“Ta ademas un desproposito etico y humano, un berdadero crimen cu ta clama na cielo, cu den un situacion di penuria, hamber, paralisis di servicio, morto y colapso nacional ta privilegia nan mes un espectaculo di distraccion den condicionnan desigual”, tambe e documentota expresa.
“Den un democracia e prome responsabilidad di tur gobernante ta atende e necesidadnan basico di hende, cu pa desgracia awe ta obliga di pasa hamber, di no conta cu e servicionan minimo indispensable pa por biba, na ocasion hasta muri, y den otro, emigra pa e necesidad di sobrevivi.
Tambe, e conferencia episcopal a considera cu e dirigencia opositor tabata incoherente. “Nan mester habri mas pa busca un consenso cu e diferente sectornan di sociedad, anto ta un condicion imprescindible di reconoce otro y logra un unidad politico cu ta bay hopi mas leu cu e alianzanan electoral.”
