Den un rueda di prensa cu a tuma luga na San Nicolas, Tanto IPA como SIMAR y G297 a uni pa organisa e conferencia “Enseñansa, nos responsabilidad”.

Chando Pietersz a splica cu for di comienso G297 a enfoca riba tereno di enseñansa den comunidad y pa esey a tuma e iniciativa pa organisa e conferencia y na caminda a haya sosten di Instituto Pedagogico Arubano (IPA) y tambe di Sindicato di Maestro di Aruba (SIMAR).

El a señala cu pa e organisadonan ta comun cu enseñansa como instituto ta di suma importancia pa e desaroyo di un pais tanto na nivel comunitario como na nivel individual, cu e conferencia aki e organisadonan kier aporta na optimalisa funcionamento y rendimento di enseñansa den tur aspecto y tambe riba tur nivel.

Loke tambe ta uni e organisadonan den e meta nan dilanti ta e hecho cu comunidad pa loke ta trata enseñansa a yega na un crusada cu si no tuma rienda pa loke ta trata e area aki, otronan lo defini e futuro di nos enseñansa na e isla “como tal, nos ta kere cu mester haci un esfuerso grandi pa por tuma e rienda den nos mesun man” el a bisa.

Igualmente nan ta di opinion cu na Aruba nan tin suficiente profesionalnan capacita cu por fiha un maneho di enseñansa pa e isla, tambe nan ta pensa cu nan tin e personal cu por guia un innovacion di enseñansa.

“Sinembargo, nos ta consciente cu e no ta algo cu un instituto of un grupo den comunidad por haci, e ta un ehercicio cu mester wordo haci conhuntamente” Pietersz a declara.

Tambe a indica cu nan ta pone hopi enfasis den comunidad cu na e momentonan aki tur di nan mester por contribui pa yega na un sistema di enseñansa cu ta abarca tur e rekisito pa un ciclo nobo den siglo 21.

Enseñansa por wordo analisa den diferente caso unda nan ta pone dos punto central como: e responsabilidad propio unda cu nan mes mester carga e responsabilidad pa cu enseñansa di e muchanan y di otro banda nan ta pone den e titulo di e conferencia ‘Enseñansa, nos responsabilidad’ pa motibo cu Pietersz a splica cu ta algo cu nan mester haci conhuntamente.

Otro punto ta enseñansa den practica cu ta un asunto compleho y ta conoce multiple faceta, ta imposibel pa atende den un solo conferencia cu tur e faceta unda cu maestronan y docentenan di scol ta urgi cu mester bin innovacion.

Organisadonan for di comienso a tuma contacto cu e veld y dirigentenan di enseñansa unda nan a yega na seis topico cu nan te kere cu e conferencia aki ta na su luga, cu ta: Enseñansa continuo y sin barera, lenganan den enseñansa, reto y perspectiva di maestro na pia di trabao, profesionalisacion continuo di e maestro, enseñansa cu sentido nacional y internacional, ehecucion y financiamento di proyectonan di innovacion, ta e topiconan di e conferencia aki.

Di su parti, Jose Fernandes Perna a trece dilanti cu enseñansa na Aruba ta bon pero tambe tin hopi persona cu ta haci observacion cu por ehemplo, Arubiano ta domina cuatro idioma cu ta Papiamento, Spaño, Ingles y Hulandes, tambe tin otro argumento unda ta indica cu enseñansa ta asina bon cu hopi studiantenan ta sigui nan estudio den exterior, “si tur esaki ta posibel, esey ta nifica cu nos sistema di enseñansa mester ta bon” pero sinembargo, tin otro partinan cu por wordo mehora.

Fernandes Perna a señala cu lenganan den enseñansa ta sumamente importante y mas ainda ta un necesidad cu Aruba como pais chikito y como destinacion turistico mester yega na un bon dominio di e cuatro lenga aki.

Asina mes, el a bisa cu nan ta kere cu den sistema aki tin demasiado obstaculo pa un alumno por desaroya lo cual e por y den e tempo cu e por, algun di nan den un tempo cortico por yega na un bon dominio di loke ta wordo ofreci, mientras otro alumno lo yega na e dominio ey pero no den e tempo estableci cu ta un aña escolar.

Marilyn Richardson cu tambe tabata presente a conta cu na IPA nan ta hay’e sumamente importante pa ta parti di e organisacion di e conferencia aki mirando cu nan tin e tarea pa educa e docentenan pero tambe un tera hopi grandi den area di profesionalisacion den cual den conferencia nan lo enfoca riba e parti ey.

“E profesion como educador, hopi biaha ta wordo eherce pa bida largo y esaki ta nifica tambe cu como maestro lo topa cu varios generacion durante e trabao aki, cu cada un di nan ta diferente cu nan propio talento, nan forma di inteligencia y nan forma di siña y loke ta importante ta, cu loke ta funciona cerca un alumno no ta funciona cerca otro”, Richardson a menciona.

E meta aki segun el a señala, no ta dirigi solamente na maestronan of docentenan, pero tambe esunnan den posicion di liderazgo pa nan tambe ta personanan cu ta inspira, cu nan ta maneha eficazmente y cu nan tin un bon organisacion den nan scol.

Durante e conferencia aki, Richardson a bisa kico tur ta ofreci na e momento aki pero tambe kico ta e desaroyonan cu tin na caminda pa e parti di profesionalisacion y con nan ta bay organis’e pa asina stimula henter campo di enseñansa pa nan sigui desaroya nan mes.

Josephine Albertus presidente di Sindicato di Maestronan di Aruba (SIMAR) a comenta cu sea un educador ta un profesion di hopi balor, e ta un profesion unda cu un maestro ta forma parti den e desaroyo di un pais.

Igualmente el a expresa cu lamentablemente a desaroya diferente retonan den e veld di enseñansa cu a ocasiona cu e maestronan a cuminsa sinti su mes incomodo y confundi cu su situacion riba pia di trabao y tambe cu su situacion personal, cu e retonan aki tambe a ocasiona cu innovacion den veld di enseñansa a stop unda cu tambe a perhudica e calidad di enseñansa cu e alumno.

“Si nos ta tuma nota den mundo, mundo ta keda desaroya y innova, esey ta buta e ora ey tambe cu un alumno den su trayectorio di estudio ta hopi importante pa tene cuenta cu innovacion na scol pa ora cu e lo finalisa su estudio y e kier drenta den mundo laboral e ta bon ekipa”, el a finalisa.