Ayera mainta na Renaissance Convention Center a celebra Dia Internacional di Hende Muhe cu participacion di mas di 800 hende muhe.

Pasa 9or di mainta, conferencia a cuminsa cu algun palabra di Sandra Croes y Julisa Hoevertsz, ken a duna gradicimento y pabien pa esunnan cu dia pa dia ta lucha pa logra nan proposito den bida.

Minister di Finanzas, Asuntonan Economico y Cultura, Xiomara Maduro a splica cu ayera mas di 800 muhe a bin pa celebra cu otro su logronan, pero tambe pa para keto pa wak kico mas nan por logra y con nan ta para na Aruba.

Tocante esey, Maduro a duna algun datonan di estadistica cu ta señala cu ta existi 6.048 mas hende muhe cu hende homber; pero den mundo tur cos ta balansa pa motibo cu e babynan mucha homber ta naciendo den mas cantidad cu mucha muhe.

Den su palabranan, Maduro a expresa cu ayera mainta el a para un rato riba un palabra cu e ta purba di practica den pensamento, cu ta ‘Ubuntu’ ; un palabra zulu di Sur Africa cu ta e creencia cu tur hende ta conecta cu otro, di un manera individual por sobrevivi.

Ademas di esey, el a gradici pa varios hende muhe cu ta den su ekipo di trabou; cu a yud’e cu sosten di economia y finanzas. El a comenta cu na e momentonan aki por conta cu un presupuesto cu surplus, cu durante mas di 10 aña no tabata existi.

Minister presidente Evelyn Wever-Croes a ofrece su palabranan, den cual el a sigura cu esaki tabata un dia importante. E conferencia aki a cuminsa dies aña pasa y for di e momento ey a marca un punto di cambio di maneho na Aruba pa loke ta trata maneho di hende muhe.

Asina mes, el a comenta cu nan ta continua cu esey pa motibo cu ta importante pa sigui enfoca riba e posicion di hende muhe. Hopi di nan a logra hopi na Aruba hayando sosten di nan mayornan, famia, casa y yiunan cu ta yuda pa forma nan cada dia.

Minister presidente a trece dilanti cu hende muhe tin hopi oportunidad na Aruba. Tocante esaki el a duna di conoce un articulo publica na corant New York Times y Forbes Magazine, cu ta mustra cu hendenan na Aruba tin hopi oportunidad, aunke el a afirma cu tur cos no ta manera mester ta. El a señala cu e salario di hende muhe compara cu hende homber tin un diferencia di 200 florin di averahe pa luna, simplemente pa e motibo di ta hende muhe; loke ta nifica cu tin mas trabou ainda pa haci.

Tambe el a duna di conoce cu ta bay institui un comision nacional cu ta bay traha riba maneho di genero pa percura tin igualdad den trato, den pago y den derecho di hende muhe y hende homber. Ta bay haci esaki hunto cu Nacionnan Uni pa Hende Muhe (UN Women).

Jeanine Rodriguez, ken a ricibi reconocemento como Muhe y Personahe di Aña 2019 na varios red social pa su compromiso y dedicacion cu su trabou di Slachtoffer Hulp, a splica cu hopi hende muhe mester cuminsa haci e trabou aki, pa motibo cu ora un persona, hende muhe, hende homber of mucha ta pasando den un momento dificil e por haci hopi pa nan. E cariño y amor cu mester duna den e manera cu tin cu papia cu nan, esey ta e cos mas grandi. “Bo tin cu duna un man y yuda nan pa bay dilanti y yuda otro”, el a sigura.

Tambe el a señala cu esaki tin diferente perspectiva, pa motibo cu ora e ta haya casonan di maltrato, abuso sexual of desgracia di auto, den cada un di nan mester sa con tin cu papia cu un hende. Su trabou ta implica cu riba caminda e mester wak con e tin cu haci pa maneha e situacion y yuda hende, “pero bo mester ta hopi conecta cu bo hendenan cu bo sa cu bo ta traha cune”. Pa Rodriguez, tur dia ta hende muhe y esey ta algo special.

Di mesun manera, Liliana Rasmijn, vocero di Cuerpo di Polis di Aruba, tocante su trabou como polis a afirma cu esaki ‘no ta un trabou facil, pero no ta imposibel tampoco’. Esaki pa motibo cu el a siña despues di añanan cu pa e trabou cu e ta aden aworaki, pa balansa sea e mama of e profesional, e ta purba di balansa tambe pa su dos yiunan, pa nan por compronde kico su trabou ta.

Pa finalisa, el a afirma cu pa via cu e ta e cara di un organisacion asina importante, esey ta trece su retonan cune, pero segun e mes a sigura: “Si bo ta pone bo mente p’e, y bo ta haci cu curason, tur cos ta posibel”.