Coney Island inspecciona pa di 7 biaha

Gobierno manera nos a bin ta raporta a schors e permiso di Coney Island pa por opera durante un periodo di 48 ora pa asina gobierno por haci sondeonan riba e mashinnan y personal pa establece e siguridad pa su bishitantenan. Sinembargo e sondeo aki cu a tuma luga ayera segun Steve Hudson, productor di Interpark Coney Island lo ta e di 7 evaluacion tecnico cu e parke ta experiencia.

Durante un conferencia di prensa ayera mainta gobierno a duna un splicacion dicon mester a yega na tuma e decision pa cera Interpark Coney Island pa un periodo temporario di 48 ora pa asina departamentonan DTI y Cuerpo Policial por evalua si e mashinnan y personal encarga cu mashinnan ta concorda cu regulacionnan di siguridad tecnico. Esaki a bin despues cu segun mandatario encarga cu husticia Andin Bikker (POR) un accidente a tuma luga na e parke unda cu un hoben a wordo herida pa via di un di e atraccionnan den e parke.

Segun e mandatario a tene den consideracion ora a tuma e decision e declaracionnan di testigonan cu a mira e accidente tuma luga hunto cu e manera con tabata laga muchanan subi e atraccionnan sin consideracion pa edad. Ademas e echo cu e parke di atraccion no a pasa un inspeccion debido na hermana islanan a contribui na e situacion cu mester a tuma e decision urgentemente pa motibo di siguridad.

Un punto cu e mandatario a subraya ta cu e permiso pa e parke por opera a wordo otorga riba 18 di october. “Esaki tabata prome cu nos a asumi responsabilidad di gobernacion riba 17 di november pues nos ta asumi cu e personanan aki lo mester a ta den contacto cu e gobernacion saliente pa a obtene nan permiso. Pa nos ta importante pa revisa esaki pa percura cu tur cos ta den orden mirando e importancia di siguridad di nos hendenan.”

Es mas, e mandatario a splica cu e manera con e permisonan aki ta wordo otorga hopi biaha no ta cay bou consulta detaya cu e minister cu ta carga e ‘responsabilidad politico’ pa e permiso cu e departamento cu ta resorta bou e mandatario ta otorga.

No a comunica cu a pasa 6 inspeccion

Sinembargo manera nos a publica prome cu e parke a habri su portanan, Interpark Coney Island segun productor sr. Hudson a wordo aproba pa inspeccion di entre otro departamento di inspeccion DTI, Cuerpo di Bombero y Cuerpo Policial. Ora cu nos a acerca e productor un bes mas ayera atardi, el a expresa na e matutino aki cu e inspeccion cu a tuma luga ayera lo ta e di 7 inspeccion cu e parke a pasa den dje. E mandatario a expresa cu e inspeccion conhunto entre DTI y polis lo mester a tuma luga ayera mainta, cual e productor di e parke a confirma. Sinembargo, segun e productor e parke no a ricibi na ningun momento un corespondencia oficial di ningun instancia gubernamental pa avisa e parke di loke ta pasando. Esunnan encarga cu Interpark Coney Island a haya sa por medio di un comunicado di polis riba rednan social.

Despues cu sr. Hudson a haci poco yamada el a bin ta haya sa ta cua incidente ta referi na dje, esta di un mucha cu a blousa su mes riba chanchan segun sr. Hudson riba e slip. E mucha di 10 pa 11 aña lo a dal su chanchan na final di e slip, cerca di e matras. “E mucha despues di a bay hospital a wordo duna conseho pa e no sinta mucho largo y pa e bay cas. Pero loke ta sorprende mi ta cu e famia mes cu tabata hunto cu e mucha a keda aki na e parke pa disfruta. No ta ami ta bisa esaki, ta e mayornan di e mucha mes despues di bay hospital cu ne a bisa cu nan ta bay bishita parke toch.”

E incidente aki segun e productor no ta suficientemente pisa pa asina dicidi di cera e parke pa 48 ora. Sr. Hudson ta reitera cu ‘riba no menos cu 6 ocasion mientras nos tabata armando e parke aki nos a haya bishita di DTI y cuerpo policial. Na final e parke aki a wordo aproba completamente’.

Pues sr. Hudson no ta comprende dicon mester bin cu un medida asina mirando cu 2400 persona a bishita e parke durante e tempo prome cu el a wordo cera. E productor ta habri pa haya mas informacion riba e proceso cu ta canando y ta spera di habri Interpark Coney Island pronto. “Niun hende kier pa nada pasa, pero lamentablemente esaki ta parti di un Coney Island. Rond mundo bo por mira cu tin accident sa pasa. Esaki ta e realidad. Pero na Aruba algo asina no a pasa ainda.”

Despues cu e departamentonan traha nan rapport basa riba inspeccion cu a wordo haci riba Coney Island lo manda esaki na e mandatario encarga pa asina tuma un decision final si lo habri e parke bek si of no. Pero te na e momento ey e parke lo permanece manera un ghost town, e unico bishitantenan consistiendo di su personal y cara animal di e parke cu nos a mira ta cana rond durante nos entrevista cual e empleadonan tabata yama Bigote.