FCC a vota pa expande Wi-Fi den banda di 6GHz, habriendo caminda pa conexionnan nobo cu lo ta esunnan mas lihe te awo.

Velocidad ta clave cu Wi-Fi, y e categoria a move lihe recientemente. Prome a bin Wi-Fi 6, un version mas rapido cu a drenta mercado na 2019. Awo, despues di un voto unanime diahuebs siman pasa, Federal Communicatios Commission (FCC) ta habriendo un banda completamente nobo di e spectrum pa acomoda aparatonan di proximo generacion diseña pa usa esaki.

Wi-Fi Alliance, un grupo di industria cu ta maneha nomenclatura di Wi-Fi, a nombra e spectrum aki y e aparatonan cu por saca bentaha di dje bou un nomber nobo: Wi-Fi 6E. E prome aparato di esaki ta spera di ta den tienda pa fin di aña.

Wi-Fi 6E no ta un version nobo di Wi-Fi manera Wi-Fi 6 tabata, sino un termino cu ta identifica aparatonan Wi-Fi 6 ekipa cu e chip y radio necesario pa opera den e masa nobo di spectrum cu FCC a caba di habri. E spectrum ta den e banda 6GHz, un banda cu anteriormente no tabata aloca pa uso di Wi-Fi sin licencia manera 2.4 y 5GHz tabata caba.

‘Bandwidth’ ta referi na e amplitud di un banda. Por ehempel, si coy un hangua y bora un boter di awa, e hilo di awa cu cuminsa sali lo representa 2.4GHz. E awa ta basha tiki tiki pero e buraco chikito ta nifica cu e awa ta biaha un distancia. Usa un clabo pa bora un buraco, y e hilo mas diki ta representa 5GHz, cu ta basha mas awa pero na un distancia mas cortico. Cu un frecuencia di apenas 70Mhz, e banda 2.4GHz ta mas delga. Manera e awa bashando, e por manda data un distancia rasonabel, pero cu un apertura asina chikito, tin un limite riba cuanto por manda. Cu 500Mhz di bandwidth, e banda 5GHz ta representa un buraco mas grandi den e boter di awa. E por manda mas data alabes – pero no por mand’e mesun leu.

Asina nos ta yega na banda 6Ghz di Wi-Fi 6E y su 1,200 MHz di bandwidth adicional. Ta como si bo a ora un buraco tamaño di un florin den e boter di awa. Cantidad di awa ta basha, pero e ta basha abou y no ta bay hopi leu.

Esey ta nifica cu e banda 6GHz lo ta bon pa conexion di rango cortico, idealmente entre aparatonan cu ta den mesun camber cu otro. Den situacionnan asina, e aparatonan lo por manda cantidad enorme di data entre nan cu henter eficiencia di Wi-Fi 6. Esaki lo ta un bentaha den luganan densamente pobla, por ehempel, stadion, unda no lo mester competi pa bandwidth.

Ademas, Wi-Fi 6 ta e clave na bandwidth limpi, pasobra no lo tin aparatonan di generacion anterior di Wi-Fi capaz di conecta riba banda 6GHz. Esey ta nifica cu rednan Wi-Fi 6E no lo tin ningun aparato di generacion anterior actuando como lasonan zwak den e cadena.

Lo tin mester di un router nobo?

Si. Lo tin mester specificamente di aparatonan Wi-Fi 6E ekipa cu set di chip nobo traha pa manda señal den e banda 6GHz. Kiermen lo mester un router nobo – y aparatonan nobo manera laptop y celular – pa por disfruta di e beneficionan di Wi-Fi 6E.

“Nos ta sperando e prome set di aparato lo bin den mercado den segundo mita di e aña aki”, segun Vijay Nagarajan, vice presidente di marketing pa division di wireless communications and connectivity di Broadcom.

Sinembargo, aparatonan – celular y laptop – lo sigui traha cu router cu ta sostene Wi-Fi 6E, pasobra Wi-Fi 6 ta compatibel cu versionnan anterior di Wi-Fi. Djis cu nan no lo opera den e banda 6GHz exclusivo.