Companianan di transport privado Uber y Lyft mester clasifica nan conductornan como empleadonan na luga di contratista, un hues di California a dicta.
E companianan tin 10 dia pa apela contra un orden hudicial preliminar. Tin controversia tocante e status laboral. Companianan di ‘gig economy’ ta bisa cu conductornan por traha riba nan mesun terminonan, mientras critico ta bisa cu nan no tin proteccion.
Un regla nobo na California yama Assembly B5 ta specifica cu trahadornan tin derecho riba dianan paga pa vakantie y malesa. Esaki a drenta vigor riba 1 di januari y ta establece tres criterionan pa defini si un trahador ta independiente of empleado.
Esaki ta numera riba e website di gobierno di estado di California y ta inclui si e “entidad contratante” tin control y direccion over trahadornan nan trabao y si trabao ofreci ta diferente cu e linea principal di e trabao di el compania.
Uber y Lyft a argumenta cu nan no mester wordo considera como “entidadnan contrantate”. Hues Ethan Schulman no ta acuerdo y ta bisa cu esaki ta contradeci afirmacionnan cu e companianan a bisa na otro luga.
“Acusadonan no mag evita mandatonan legislativo simplemente pasobra nan negoshinan ta asina grandi cu nan ta afecta mil di hende”, e a skirbi. Un portavoz di Uber a bisa: “E gran mayoria di conductornan kier traha independiente, y nos a haci hopi cambionan den nos app caba pa sigura cu esaki no ta cambia bou ley di California.”
Lyft a bisa cu “conductornan no kier ta empleadonan”. E estado di conductornan basa riba app lo wordo determina den un votacion den un referendum en California na november. Mike Feuer, fiscal di ciudad di Los Angeles, a describi e fayo como “un victoria rotundo” pa conductornan.
