Diferente gobierno di region a mustra nan preocupacion pa e situacion na Venezuela, cu a ser califica como “autogolpi”, despues cu TSJ a tuma e competencia di parlamento (AN), mientras cu Union Europeo a pidi eleccion y respet pa AN.
Canciyer di Mexico, Luis Videgaray a sigura cu su gobierno ta preocupa pa deterioro di orden democratico na Venezuela. E diplomatico a manda su mensahe despues di un reunion hunto cu su colega di Colombia, Maria Angela Holguin.
Brasil a protesta tambe via un comunicado cu un mensahe di condena pa e decision. “E gobierno di Brasil ta rechasa e sentencia di TSJ caminda a retira funcion di AN den un kiebra di orden constitucional”, ministerio di relacion exterior di Brasil a splica. Gobierno di Chile a mustra su preocupacion pa decision di TSJ. “ E situacion aki ta obliga nos pa bay den consulta cu pais amigo y haya sa con nos ta bay haci awo”, Heraldo Muñoz, canciyer di Chile a bisa.
Union Europeo a pidi un “calendario cla cu eleccion” na Venezuela y a haci un yamado pa “respeta asamblea nacional (AN) y tur su miembronan”, despues di e decision di husticia Chavista. Union Europeo a expresa su mes den un comunicado di Servicio Europeo di Accion Exterior. Canciyeria di Peru a papia di e salida definitivo di su embahador di Venezuela. “Nos no por acepta loke ta pasa na Venezuela”, Pedro Pablo Kuczynski, presidente di Peru, a splica.
Luis Almagro, secretario general di OEA a denuncia “ e autogolpi di estado cu e regimen Venezolano a haci contra AN”. Asambla Nacional ta e ultimo organo cu a haya legitimacion a base di voto popular.
