Corte den prome instancia a condena e acusado Burney “Nini” Fonseca na un castigo di prizon di 25 aña pa su rol den likidacion di e dirigente politico dia 5 di mei 2013.
Segun e acusacion, Fonseco tabata e intermediario entre esunnan cu a mata Wiels y esunnan cu a paga pa mata e dirigente, na e momento ey e politico mas popular di Corsou. Durante tratamento di e caso Ministerio Publico a pidi un castigo di prizon di 26 aña.
Hues, sra. Paulides den su sentencia di ayera mainta a bisa, cu ta proba cu e acusado dia 5 di mei 2013 den cooperacion cu otronan deliberadamente y den forma premedita a mata Wiels cu un arma di candela.
Hues a bisa cu e pruebanan pa condena Fonseca ta basa riba cuater pila importante cu ta declaracion di tres testigo, diferente mensahe SMS entre e acusado y e otro acusado G.R.M. J. (cu ta Jorge Jamaloodin). Tur e cuater elementonan aki di e acusacion riba nan mes lo no tabata suficiente pa un condena, pero ora conecta nan cu otro, nan ta duna suficiente solides den e material di prueba pa yega na pruebanan necesario pa un condena. Un di esunnan cu a testigua contra Fonseca ta e homber cu a mata Wiels cu ta Elvis “Monster” Kuwas.
Sra. Paulides a bisa den su motivacion cu e derecho riba bida ta un derechonan mas fundamental cu mester haya proteccion den nos orden constitucional. Banda di esey e actuacion violento pa mata Wiels y pa colmo den dia cla ta lanta sentimentonan di insiguridad cerca nos poblacion. E atentado aki no solamente a sacudi nos orden constitucional, pero henter nos comunidad seriamente.
Asesinato di un lider politico y parlamentario pa definicion ta haci daño reparabel na e proceso democratico loke ta nifica cu e asesinato aki tin tambe un caracter politico. Fonseca por apela e sentencia. E mes a scucha e veredicto via di e sistema di video conferencing for di Hulanda caminda e ta sinta un castigo awor aki, por cierto pa un otro delito.
E otro acusado menciona awe cu ta Jorge Jamaloodin ta detene actualmente na Venezuela pendiente di su extradicion pa Corsou.
