Condado ta prohibi mucha sin vacuna den espacio publico

Un condado den suburbionan di New York City a declara estado di emergencia ayera tocante un brota di sarampion cu a infecta mas di 150 persona desde herfst, sperando cu un prohibicion contra muchanan sin vacuna den espacionan publico ta spierta e mayornan tocante e seriedad di e problema.

Ehecutivo di Rockland County, Ed Day, a bisa durante un conferencia di prensa cu un stap asina drastico nunca a wordo tuma na Merca den pasado. El a bisa cu a tuma e accion cu speransa di reverti un crecemento recien den caso di sarampion, entre reportenan preocupante cu trahadonan di salud a encontra resistencia ora di investiga casonan.

E brota na Rockland a afecta mas pisa comunidadnan hudiu ortodox, den cual porcentahe di vacunacion ta usualmente mas abou.

Bou di e declaracion, cu lo dura pa sikiera 30 dia, cualkier persona bou 18 aña sin vacuna ta prohibi na luganan di reunion publico, incluyendo centro comercial, centro civico, scol, restaurant, y hasta casnan di adoracion. Esun cu viola esaki lo wordo acusa di delito castigabel cu te hasta seis luna di prizon.

Pero Day a reconoce cu no tin un esfuerso concreto pa cumplimento, y e intencion no ta pa aresta hende, sino pa enfatisa e seriedad di e situacion.

E condado ta experienciando e brota di sarampion di mas largo den estado di New York desde cu e malesa a wordo declara como oficialmente elimina di Merca na aña 2000. Oficialnan di salud a bisa cu e miho forma pa stop e malesa ta un porcentahe di vacunacion den comunidad di 92 pa 95 porciento. Day a bisa cu apenas 72.9 porciento di persona bou 18 aña a wordo vacuna contra sarampion na Rockland County, cu tin mas di 300,000 residente.

E malesa a cuminsa den e area ora cu shete turista sin vacuna diagnostica cu sarampion a drenta e condado october ultimo, y awo ta conta cu 153 caso, segun Day. Na cuminsamento di e brota, hende tabata coopera cu oficialnan di salud y vacunando muchanan, el a bisa, pero esey a cambia.

Un hues federal, citando un ‘brota di sarampion sin precedente’ e luna aki a nenga un peticion di mayornan pa laga 44 mucha sin vacuna bolbe na un scol Waldorf na Rockland County. Riba e mesun dia, organisacionnan pediatrico a expresa sosten pa legislacion estatal cu lo permiti menornan ricibi vacuna sin permiso di nan mayor.

E patrocinadonan democrata di e legislacion estatal a bisa cu demasiado mayornan ta kere declaracionnan sin base online, cu vacunanan ta peligroso y por causa autismo y otro malesa.