Henter e aña sindicato SIMAR tabata druk cu diferente trabou. E conclusion pa e sindicato ta cu maestronan hoben no ta bon informa kico ta nan derecho y deber y kico nan tin di haci. Secretaria di SIMAR a duna un relato di kico tur nan a haci durante henter e aña.
E aña aki SIMAR tabata tin hopi enfoke riba casonan interno, casonan individual den scolnan, caso personal manera e sindicato ta yama nan. Tambe nan tabata trata algun caso di grupo di trahado den enseñansa, di cual esaki ta masha poco, segun secretaria di SIMAR Sra. Maroeschka Cornelie na Bon Dia Aruba. Hopi di e casonan aki tin di haber cu trahadonan ta mal informa, trahado cu no ta completamente informa. Kiermen nan ta bay traha y no ta haya e informacion corecto for di nan dunado di trabou. Kico ta nan derecho, kico ta nan deber y despues nan ta haya nan mes den problema.
Mal ubicacion di salario
“Por bisa cu hopi caso tabata tin di haber cu abuso di poder,” e ta bisa Bon Dia Aruba. Tambe hopi caso tin di haber cu mal calculacion di salario. “Hendenan no ta poni caminda nan mester ta pa loke ta nan derecho di pago,” e sindicalista ta indica. Sindicato SIMAR mester a cana caminda basta largo pa cierto cosnan cu en realidad por a wordo drecha den un rato, pasobra ta simplemente hende no tabata bon ubica den salario y mester a cana hopi.
E aña aki e sindicato a haya nan cu problema grandi pa loke ta e management di EPI, di cual Sra. Cornelie no a duna mas informacion riba esaki.
Miembresia
Pa loke ta miembresia, un cantidad minimo di hende a entrega nan retiro, segun Sra. Cornelie. Pero di otro banda e sindicato a haya hopi miembro nobo. Esaki ta algo cu e sindicato ta hopi contento cun’e. Tambe nan tin basta miembro cu a bay cu pension y esaki a hunga un rol basta grandi riba e miembresia di SIMAR. E secretaria a bisa Bon Dia Aruba, cu SIMAR ta exigi door di e miembresia su contribucion. Pa motibo cu hopi hende a bay cu pension ta hunga un rol riba e sindicato, pasobra nan ta keda como miembro pero nan no ta contribui mas.
Traha riba diferente factor
SIMAR a traha riba diferente factor hunto cu Ministerio di Enseñansa. Hopi factor ta importante y un di nan ta cu e sindicato a participa na e comision “Witte vlek,” nan a participa na e comision cu a traha na “Good governess” di APFA. E ta sigui indica, cu nan a traha hunto cu e comision y ainda ta tratando riba e construccion di salario cu mester drenta na vigor na 2016 pa e luna di augustus. “Nos ta hopi leu den esey. E comision ta traha hopi bon cu e schedule,” e ta bisa. Hopi importante den 2015 ta cu e sindicato a uni na e Union Sindical di Aruba (USA).
Fiesta di SIMAR
Normalmente e sindicato ta custumbra di habri e aña cu un fiesta grandi y durante mita aña haci un otro fiesta grandi, pero e aña aki e directiva actual a dicidi di trece un cambia na esey. Nan lo haci un fiesta otro aña pero na un manera diferente no na cuminsamento di aña, e ta bisa Bon Dia Aruba. “Nos ta bay haci e fiesta na comienso di aña pero no dia di aña nobo manera custumber,” e ta indica.
Conclusion di SIMAR
Como conclusion di henter aña SIMAR por a saca afo door di comentario, door di feedback cu nan ta haya via e-mail, door di feedback cu nan ta haya personalmente, cu e maestro hoben no ta bon informa, ni di su derecho ni di su deber. Tampoco di e trabou cu SIMAR ta haci na bienestar di tanto enseñansa como na su bienestar.
A puntra Sra. Cornelie dicon e maestronan hoben no ta bon informa. E ta indica cu hopi hende ta papia cu SIMAR no ta haci nada pa nan. Pero SIMAR no tin mester publica cu e ta hinca den hopi comision, kico precies e ta traha. Pero si hende kier sa precies kico e sindicato ta haci, nan por acerca e sindicato y puntra prome cu saca un conclusion.
Un ehempel cu Sra. Cornelie a duna ta cu na 2008 e sindicato a welga y cu ta berdad nan no a haya hopi, pero a haya 105 florin riba e salario indexering. Pero danki na e welga ey, e sindicato a gana e respet di e gobernantenan di e tempo ey y di esunnan cu a sinta despues. “Nos a keda negocia, nos a keda adapta. Door di esey nos tin premies cu nos ta cobra. Y e premies cada bes ta subi door di e trabou sindical,” e ta indica.
