Academia di musica y baile Zion ta preparando pa un concierto cu ta bay tuma luga durante fin di siman. Sr. Giovanni Arendsz, vocero di academia Zion, ta splica un poco kico e academia Zion ta, nan meta y kico comunidad di Aruba por spera durante nan concierto den fin di siman.

Academia Zion System Music & Dance a nace aki na Aruba ariba dia 6 di juli 2020 cu lesnan di musica. E academia a cuminsa bao di e Fundacion ‘Iglesia Cuadrangular El Legado’ cu for di januari 2022 a cuminsa prepara pa e concierto aki cu ta titula ‘Un Anochi di Talentonan’.

Arendsz ta splica cu Zion ta un academia musical cu ta bao di direccion di dr. Jonathan Zubiandi, ken ta un maestro di musica den tur sentido di palabra. El a remarca cu tin hende ta educa nan mes den un solo materia musical of un solo instrument, pero e profesor aki ta multifuncional den su musica y ta duna les di baho, piano, guitara, cuarta, drum, vocalisacion, solfeo y mas.

Zubiandi a ricibi su educacion na Caracas, Venezuela na unda el caba su conservatorio y despues el a haya e oportunidad pa bin Aruba. Banda di esey e ta dedica su mes na e parti religioso como pastoor.

Arendsz a subraya cu academia di musica Zion ta un parti separa di esey, sin mescla un cu e otro, pasobra el a indica, nan ta respeta cada persona nan creencia y Aruba tin asina hopi talento pa duna y ta cuminsa cu e hobennan.

“Manera mi a menciona caba dia 6 di juli 2020 a cuminsa cu e actividadnan di duna hobennan les den diferente instrumentonan y esey a keda cana bon y aworaki nos ta introduciendo Zion mas publicamente pa comunidad conoce un tiki mas di e academia”, el a bisa.

E studiantenan di Zion ta haya e lesnan di musica den periodonan di seis luna y ta wordo parti den tres nivel, white, nivel pa principiante, silver, nivel pa esnan cu algun tipo di capacidad musical y gold, nivel pa esnan avansa. Cada seis luna tambe, dos biaha pa aña, Zion ta organisa un concierto cu ta motiva e hobennan pa sigui desaroya nan talentonan musical.

Academia Zion ta ofrece les di danza tambe den diferente genero di baile manera baile contemporaneo, estilo urbano, afro dance y tambe les di Zumba, incluso pa esunnan di tercer edad. E lesnan ta wordo duna pa Sra. Dayana Sequera de Zubiandi, casa di Sr. Jonathan Zubiandi y hunto nan ta dirigi e Academia Zion System Music & Dance.

Dayana tambe ta educa na un nivel spiritual y ta ofrece conseho matrimonial, conseho pa hoben y pa famianan cu tambe tin biaha mester ayudo pa fortalece nan formalisacion di no solamente nivel spiritual, pero tambe pa guianan pa mehora comunicacion familiar na cas.

“E ta un parti cu no ta cay solamente bao di Zion, pero esey ta bira e parti di e famia cu mester trata di crea aki na Aruba. Dificil pasobra nos tin hopi organisacionnan cu tambe tin e lucha ey y mi ta kere esey ta e parti bunita”, el a enfatisa

Academia Zion no ta solamente pa hoben, e ta pa hende grandi tambe. Edad di participantenan ta cuminsa na un edad di nuebe aña y ta bay te na un edad di 60+. Durante e concierto di diadomingo e publico lo mira diferente categoria den diferente genero di musica y instrumento compaña pa canto y baile. E programa ta ilustra tur local Zion ta brinda na e persona cu ta bay pa haya les.

Por ultimo Arendsz a extende su invitacion na pueblo di Aruba pa pasa disfruta di e concierto ‘Un Anochi di Talentonan’ diadomingo awo cuminsando pa 6:30 di atardi na iglesia Nos Cunucu. “Ban apoya nos Arubianonan, hobennan cu ta dunando di nan parti pa asina ey demostra nan talento den nan educacion musical”, el a finalisa.