Recientemente Krosshart a tene dos anochi di concierto cu a resulta di ta un exito. Den un entrevista cu Bon Dia Aruba, Chris Kross di Krosshart ta conta con e preparacion pa e conciertonan a bay, su experiencia, algun plan pa futuro y tambe con na final nan a logra continua cu e concierto despues di algun piedra chikito den caminda.

Chris ta conta cu e preparacion pa e conciertonan a cuminsa di trempan. Tabata algo completamente diferente, un experiencia nobo, y door di e magnitud di e concierto nan no tabata sa kico pa spera durante e proceso di preparacion. “Esaki ta e prome biaha cu nos a organisa un concierto asina grandi y nos no tabata sa kico nos lo encontra en realidad. Nos a yega di haci show y concierto, pero riba un escala hopi mas chikito. Kiermen e biaha aki nos a cuminsa prepara eigenlijk tres luna prome cu concierto mes”, el bisa.

A pesar cu e parti organisatorio tabata tereno desconoci pa nan y nan no tabata sa cuanto trabao e tabata, Chris ta expresa cu e contento cu na final e shownan bay bon y nan a haya mas conocemento di kico por mehora pa e siguiente biaha cu nan organisa n concierto asina grandi, sobre todo den e parti di logistica y maneho, el a señala.

“Nos tabatin un schedule pa tur cos, pero por ta nos no a tene cuenta cu un espacio entre un cos cu e otro. Nos a pone hopi cos di biaha tras di otro y tin biaha cosnan ta cay laat. Cosnan chikito asina nos a siña hopi di dje”, Chris a menciona.

El a sigui splica cu e preparacion musical a cuminsa for di trempan, tres luna prome cu e fecha di e conciertonan, unda cu nan a cuminsa papia di repertorio di canticanan, instrumentnan specifico cu nan tabata kier pa concierto. Y asina tempo a bay hopi lihe te na e dianan cu nan a cuminsa train e canticanan mes pa e show. Nan a busca musiconan di afo tambe, di Corsou, pa bin toca cu nan y Chris a menciona cu nan ta hopi contento cu e reaccion tambe.

Na mesun momento el a subraya cu cantante Izaline Calister mes tabata hopi entusiasma cu e concierto, y for di dia cu el a yega na e trainingnan pa prome biaha, e tabata hopi emociona. “E tabata baila, e no tabata stress cu nada pasobra nos tabata tin full e musica bon, kiermen tur hende tabata bon prepara. E tabata hopi contento tambe cu esey”.

E conciertonan tabata un experiencia cu no tabatin solamente musica, pero tabatin baile y un documentario di Krosshart mes tambe. Segun Chris ta conta, e documentario ta mustra e proceso di grabacion di nan album mes, cual nan presenta durante e conciertonan. Nan a graba aña pasa y e documentario ta mustra e proceso completo di grabacion. “Nos a pasa un parti di dje prome cu e concierto a cuminsa pa e hendenan conoce nos un tiki mas di cerca tambe y kico nos kier haci”, el a bisa.

“Nos a pasa mas o menos 30 minuut di e documentario y eigenlijk e ta mas largo cu mey ora, pero ainda e no a sali. Nos ta bay saca full e documentario, no na pida pida, y nos ta cabando cune tambe pa nos avisa cu e ta bay ta disponibel”, el a agrega.

Krosshart ta enfatisa cu nan ta sumamente contento y e plan eigenlijk, e idea pa tin Izaline hunto cu nan riba stage, tabata pa nan toca e canticanan cu a inspira nan ora nan tabata mucha. El a sigui conta cu e album Crioyo di Izaline ta e album cu a influencia su mes y su compañero Siegfried masha hopi mes, pasobra nan tur dos tabata scucha e canticanan di e album hopi ora nan tabata jong.

“Ora nos a papia cu Izaline na telefon nos a bis’e cu esey ta e album cu a echt toca nos hopi y nos kier haci mas cantica di e album aki y e mes a gusta e idea. E mes tabatin hopi aña sin canta e canticanan aki pasobra el sigui desaroya, el sigui saca cantica y e unico cantica cu e tabata canta di e album tabata Wow’i Cariño. Nos a pidiele pa e canta e otro canticanan, mas cantica di e album y e ora ey e mes mester a bay studia su mesun canticanan. Pero e tabata amazing, e la a pasa bon y nos tambe a pasa bon”, Chris a conta.

E conciertonan tabata asina exitoso, tur dos anochi tabata sold out y hasta tabatin e oportunidad pa wak e ariba Pay per View, cu den futuro lo por tin un ABC tour di e concierto y tambe tin ariba mesa e posibilidad pa crea mas musica hunto.

Aunke e conciertonan tabata un exito, Chris ta conta cu toch tabatin algun momentonan cu pone algun piedra den caminda. El a splica cu e mainta di e prome dia di e concierto, coriente a bay na Cas di Cultura y esaki a haci cu nan a cay full atras cu nan schedule, nan no por a soundcheck y nan a cuminsa un ora laat.

Otro cos cu a pasa tambe ta cu algun ora prome cu e show, un mensahe tabata circula ariba WhatsApp y rednan social cu tabata bisa cu e show a wordo cancela pa motibo di COVID-19. Chris ta splica cu Korsshart a tuma contacto cu DVG e dia di concierto pa conseho. Basa ariba e conseho cu DVG a duna y siguiendo nan medidanan, Krosshart a tuma e decision di sigui cu e concierto.

A pesar di e sucedidonan aki, Chris ta enfatisa cu e ta sumamente contento y agradecido cu e reaccion di publico tabata positivo y cu tur persona por a disfruta di e gran concierto aki.