E aña aki e concierto conoci como Winter Wonderland a bira ‘E Experiencia Cunucu Wonderland’ manera Edjean Semeleer a sigura durante un entrevista cu Bon Dia Aruba. Tambe a sigura cu te ainda tin oportunidad pa hendenan interesa por disfruta di dje awe nochi.

El menciona cu e nomber di e concierto mas famoso di e temporada di Pasco a cambia pa Cunucu Wonderland pa motibo cu na Aruba no ta conoci e stacion denomina winter pero cu e idea inicial tabata pa haci e concierto aki den un cunucu, mirando cu tempo ta asina impredecibel cu no sa ki dia awa ta yobe of no, nan a dicidi di no tuma e risico ey di bay den aire liber den un cunucu.

“P’esey nos a dicidi cu nos ta bay na Renaissance Convention Center pa por ta safe atleast cu si awa ta yobe nos ta paden, sin perde e esencia di loke nos kier presenta cu ta un concierto cu hopi clasico di fin di aña y cu un orkesta grandi riba escenario cu lo presenta e cancionnan aki”, el a sigura.

Despues di 13 aña, Semeleer ta bay bek pa presenta un concierto di Pasco den Renaissance Convention Center y cu te awo e ta bayendo hopi positivo pa e publico cu ya caba a adkiri nan carchi.

Tambe, esaki lo tuma luga dos aña despues di pandemia Covid-19 unda cu nan no por a haci un concierto di fin di aña pa publico, e ultimo tabata na Ser’i Noca na 2019 yama “Hey ta Pasco” y tabata e celebracion di Semeleer su 25 aña den farandula unda den e ultimo dos aña aki segun el a expresa nan a graba for di e sala di su cas cu su orkesta pa asina ey por yega na comunidad via rednan social y television sin publico.

“Despues di dos aña nos ta bek cu un concierto di Pasco di gala pa e publico”, el a bisa.

Esnan interesa di aprecia e concierto aki cu ta bay ta awe for di 8or di anochi, el a afirma cu te ainda ta bay tin disponibel carchinan di entrada den e porta di e convencion center y full e set up ta bay ta VIP cu mesanan y stoelnan den full e sala, e prijs pa cada carchi ta di 50 florin.

Di loke ta trata e concierto, Semeleer ta hopi contento cu e reaccion di e comunidad ya cu e promocion di e concierto aki no tabata hopi largo, Go Cultura Foundation a enfoca riba e Premio Nacional Crioyo di Oro dia 30 di november ultimo y e promocion pa esaki a cuminsa dia 5 di december.

“E reaccion ta hopi bon, bo ta mira cu hendenan tin un tipo di gana pa kisas algo di e estilo aki, pero hopi di esnan cu ta bayendo ta hendenan cu ta bay na mi conciertonan, e hendenan ta bay haya un calidad halto di musica y mi mes ta hopi entusiasma pa e anochi di awe, mi ta echt ansioso di por topa e publico, e ora ey bo ta sinti e bon energia y e contacto di e hendenan”, el a sigura.

Lo tin varios artista riba scenario como Chris Kross, Rajiv Landaeta, Arelis Frank, Jeanedy Semeleer, e bailarina Adriana Koslov, entre otro, unda Edjean Semeleer ta e protagonista pero e idea ta cu cada un di nan ta un artista individual riba nan mes unda hende ta gusta nan y ta follow nan tambe y ta bay tin un showcase como artistanan.

Pa Semeleer e temporada di Pasco y di Fin di Aña ta uno masha special mes pa su persona, e ta gusta e feeling cu e musica di fin di aña ta crea y genera cerca dje cu ta nostalgia, alegria y por reflexiona riba e aña cu ta pasando y cu ta bay pasa, e otro banda ta e comparti cu famia “esey pa mi ta un cos cu mi ta disfruta masha hopi mes di dje y e bon cuminda no por falta pa por prepara nos pa e aña nobo”, el a comenta.

Su mensahe pa nos lectornan ta “pa tin mas compasion y comprension cu otro, pa sea mas empatico y pone den sapato di otro hende y djis purba comparti un tiki mas amor durante e aña nobo”, el a finalisa.