E fundacion Concierto Dominical Donny Laclé a tene su prome actividad di 2017 na Biblioteca Nacional Aruba su sede na Playa.  Cada ultimo diadomingo di luna nan ta tene su concierto cu e asistencia di un grupo fiel di publico cu pa añanan nan ta bin apoyando e meta di e fundacion aki.

E concierto aki ta inclui mas bien musica so, aunke den pasado nan tabata declama y realisa otro tipo di expresion artistico-cultural. Un actividad inolvidabel ta esun cu a tuma luga na aña 2015, caminda un grupo di coro conforma pa muchanan a canta na puro bos varios cantica di Pasco,  representando e bunita historia tras di e celebracion aki. Pues esaki ta e meta tras di e fundacion, esta apoya e talento musical di nos muchanan y hobennan, segun sra. Mayra de Graaff-Robles.

Te hasta studiantenan di IPA a bay toca a base di nan  preparacion musical pa bay duna les na e muchanan na scol. Tambe tin tocamento di musica clasico y otro variedad di genero musical.  Cada pasa un luna nan ta purba di bin cu un mucha di Scol di Musica Rufo Wever  pa nan haya e experiencia y con importante ta loke nan ta haci sanamente; pero tambe pa e hendenan apoya nan.

Ta asina aki cu tur musico cu ta actua den nan concierto, tanto e hobennan pero tambe e profesionalnan,  no ta cobra niun cen preto pa bin actua. Tur cos ta pa amor na arte y cultura.  Nan ta hacie gratis pa asina e fondo recauda den cada actividad lo por yuda e hobennan desaroya nan talento musical.  E fundacion aki ta paga nan beca na scol di musica. Ta e caso di un hobencita na Aruba cu ta hayando les di canto via online cu un cantante profesional na Merca.

Historia
De Graaff-Robles  a referi na historia di e concierto dominical aki cu a cuminsa originalmente na biblioteca mes,  mas cu 18 aña pasa . E concepto original e tempo ey tabata si bo sa toca un instrumento gewoon bo tabata toke. Of si bo tabata kier declama un poesia bo tabata hacie, e tabata un concierto  habri.

Despues nan a bay otro caminda na Emanstraat  y finalmente e concierto a muda na Manchebo pa hopi aña. E tempo aya,  Donny Laclé hunto cu Joyce Pereira  tabata buscando un luga y Lacle cu  tabata un bon amigo di e filantropo y pilar di mundo di turismo riba nos isla, Ike Cohen  a ofrece e restaurant den su hotel pa bin cu e concierto eynan.  Pa tres lustro e concierto a wordo realisa na Manchebo, te cu aña pasa ora cu a cambia di sede y bay na biblioteca bek, unda originalmente e concierto aki a nace.

“Manchebo a bay renoba  y e luga a bira mas chikito, anto nos mester busca un luga tog y nos a haya biblioteca”, asina  Graaff-Robles a declara na Bon Dia Aruba.  E dia cu e periodista  Donny Laclé a fayece, sr. Ike Cohen (d.f.m)  a dicidi di lanta un fundacion bou e nomber: Fundacion Donny Laclé pa talento di hobennan musical.

E concierto aki ta pa hendenan di tur generacion ya cu “e musica cu bo ta tende ta lanta tur hende”, asina De Graaff-Robles  a expresa cu un sonrisa riba su cara.

Mayra de Graaff-Robles a bisa cu dia 26 di februari lo ta un excepcion cu nan  no lo tene nan concierto, ya cu ta dia di parada grandi di Carnaval.  Pa luna di december tambe nan ta para nan actividad, ya cu ta dificil pa organisa esaki debi na e temporada di Pasco y Fin di Aña.

Prome cu nan ta bin cu nan concierto nan ta manda nan anuncia pa asina e corantnan informa di dje.  Tambe nan ta manda nan invitacion via e-mail adres pa esunnan interesa di disfruta di nan gran conciertonan. Ainda nan ta trahando riba nan metanan pa e aña aki, y pa dia 26 di maart cu ta e siguiente concierto, nan lo tin un bista di tur e hendenan cu a cerca e fundacion pa nan toca y brinda nan apoyo cu musica pa nos generacion nobo di musico.

De Graaff-Robles ta hopi contento cu tur biaha cu nan tin un concierto nan ta haya un sala di biblioteca yen di hende  cu ta bin aprecia e musiconan cu ta toca, apoya e musiconan nobo y bin pasa un rato agradabel diadomingo mainta. Tur hende ta bonbini for di 11or di mainta te cu 1or di merdia, tur ultimo diadomingo di luna.