Den fin di siman lo tuma luga e concierto di artista local reconoci internacionalmente, Jonathan “Jeon/Biggy Boy” Thiel. E concierto titula “Biggy Boy Forever” a conoce diferente fecha pa motibo di e pandemia, y despues di dos aña, esaki ta bay tuma luga riba diabierna y diasabra, 25 y 26 di maart den Renaissance Convention Center.

Inicialmente e concierto tabata plania pa un solo anochi, pero mirando e demanda di e fanaticonan, e organisacion di e concierto a tuma e decision pa pone esaki un anochi mas. Portanan lo habri desde 8or di anochi, entre 9:30 y 10or di anochi e show lo cuminsa y na final di e concierto lo sigui pa un after party cu lo ta na Convention Center mes.

Thiel a indica cu nan ta preparando full swing hunto cu su director musical T-Drick. El a splica cu nan tin hopi tempo caba preparando, manera menciona caba, nan tabata preparando e show aki for di aña 2020 caba y locual nan a haci aworaki ta simplemente repasa e show. El a subraya cu automaticamente durante dos aña hopi mas idea a bin y nan a expande e show. “Nos ta preparando full swing pa nos duna e fanaticonan hopi nostalgia y pa nan biba e momentonan atrobe di Biggy Boy”, el a agrega.

El a splica tambe cu loke a bin acerca pa e show ta e artistanan invita. Prome nan tabata bay haci e show Biggy Boy e anochi completo, pero aworaki tin diferente artista invita ta bay presenta durante e show. “Ta bin artista for di Hulanda, artista for di Boneiro y Corsou y tambe lo ta bay tin algun artistanan invita for di Miami, no pa canta, pero pa wak e show, amigonan di mi, artistanan invita. Nos ta bay tin e anochi aki hopi sorpresa. Nos ta bay corda momentonan dushi”, Thiel a subraya.

Na mesun momento el a remarca cu e concierto aki ta bay bira un concierto hopi diferente, esaki el a splica den e sentido cu na momento cu e persona yega e concierto no ta bay ta manera concierto normal unda lo tin DJ ta toca prome cu e show cuminsa. El a splica cu ora e personanan yega nan ta sinta paden y lo tin musica suave ta toca pa asina prepara nan pa e experiencia.

“E ta bay ta un concierto super diferente, love songs henter anochi y despues di esey after party. Mi ta bay canta solamente canticanan di tempo di Biggy Boy, cu ta mi temporada cu mi a saca canticanan di amor, di curason kibra y tur e canticanan cu e hendenan ta conoce di mi di tempo di Biggy Boy”, Thiel a enfatisa.

T-Drick, director musical pa hopi aña di Jeon, tambe tabata presenta n’e conferencia di prensa y el a garantisa cu e show ki ta un di e shownan mas grandi cu nan a yega di haci, pasobra e show lo ta mas o menos 40 cantica di amor di Biggy Boy. El a sigui splica cu e banda a e anochinan di e concierto lo ta e banda di Jeon di semper y lo tin drummer, percusion, coro, show di luz, guitara y lo tin tambe musiconan invita, entre otro musico di violin.

“E meta di e show ta cu e ta bay ta un experiencia. E hendenan ta bay yega y e no ta bay un concierto tradicional, e ta bay ta un experiencia, nan ta bay sinti manera antes, manera tempo nos a saca e canticanan ey, con nan tabata sinti curason kibra, con tabata sinti namora. Kiermen full e experiencia ey nan ta bay pasa cu nos”, T-Drick a indica.

Na comienso di maart a anuncia e competencia caminda un persona ta gana e oportunidad di propone matrimonio, cu un renchi di 15 mil florin, durante e concierto di Biggy Boy Forever. Tocante esaki, Thiel a splica cu nan a ricibi mas di 100 email cu hopi hende interesa pa haci nan propuesta di matrimonio e anochi ey y ya tin un ganador.

Thiel a conta cu e mes personalmente a lesa e email di e persona cu a gana y e manera con e persona a expresa a touch su curason. El a remarca cu obviamente nan a haci un screening, mirando cu ta un renchi di 15 mil florin y despues di un bon screening caminda nan a mira tur cos, potret etc. pa confirma cu e intencionnan ta sigur, Thiel a sigura cu e persona aki merece di ta e ganador.

“E anochi aki ta bay tin un tension pasobra niun mucha muhe no sa si nan ta esun cu ta bay wordo proponi. Tur ta bin nechi bisti, tur ta haci huña pasobra nan no sa unda e renchi ta bay ta, dus e ora e ta bay ta un tension e anochi aki. Ta bay yega un momento cu e luznan ta cende y e persona aki ta bay ta na rudia”, el a agrega.

Na final di e conferencia Jeon a gradici tur persona cu a yuda haci e anochinan di su concierto posibel, na su fanaticonan y a invita tur fanatico pa cumpra nan carchi si nan no a haci esaki ainda y alabes a expresa cu e concierto aki lo ta dedica na su ruman muhe, MelanieThiel.

“E ta bay bira un experiencia nobo, esaki ta bay bira mi show di mas grandi cu mi ta bay haci na Aruba y mi ta invita e pueblo di Aruba pa ta presente. E anochi aki ta bay wordo dedica na mi ruman muhe tambe, Melanie Thiel, que en paz descanse. E anochi aki ta bay ta special pa mi, e ta e persona cu a hinca full e concierto aki den otro y e anochi ki nos ta bay dedik’e na dje”, el a finalisa.