Conseho di Minister di Reino ayera a aproba e proposicion di rijkswet College Aruba Financieel Toezicht, RAft y tambe e proposicion di rijkswet Caribisch Orgaan voor Hervormingen Ontwikkeling. Ambos ley awor a bay pa Tweede Kamer.
Particularmente e ley di COHO a haya cambionan despues cu Raad van State a haci observacionnan critic riba e embergadura di e organo. E cambionan den ambos rijkswet a haya sosten di Gobierno di Aruba.
Manera ta conoci, ta for di 2015 cu tin un College Aruba Financieel Toezicht, CAft, pero esaki tabata basa riba un palabracion entre Hulanda y Aruba, regal segun ley di Aruba. Aunke cu a pasa un ley pa duna Parlamento di Aruba mas poder den e raportahenan, Gobierno di Reino a mustra Aruba riba e palabracionan y e ley aproba, entrega pa entre otro lider di fraccion di MEP e tempo ey, sr. Rocco Tjon no a drenta na vigor.
Awor CAft lo cay bou di un asina yama consensus rijkswet.
Mescos ta conta pa COHO, pero cu si a conoce cambio substancia segun Dossier Koninkrijksrelaties.nu.
E cambionan aki ta basa riba e opinion di Raad van State riba e prome concepto, cu pa un of otro motibo a leak. Door cu a publica e conseho prome cu Parlamentonan di Reino a haya e proposicion, Secretario di Estado Raymond Knops a dicidi pa publica e conseho di Raad van State cu berdad a mustra cu e prome concepto ta mina autoridad y responsabilidad di Gobierno y Parlamento di entre otro Aruba.
E cambionan awor ta den e concepto y algun siman pasa Prome Minister Evelyn Wever Croes a bisa di ta sostene e concepto di rijkswet.
Ambos ley ta dirigi na yuda mehora e posicion financiero y di debe di Aruba y pa haci Aruba economicamente resiliente.
Nan ta mara Gobierno formalmente na reformanan riba diferente nivel, for di e aparato public te na cambio di sistema fiscal y di belasting, ademas cu ta bay fortifica e area di husticia.
