Recientemente minister Dangui Oduber (MEP) a ricibi un carta di Arubaanse Voetbal Bond (AVB). E carta aki a wordo manda pa Concacaf cu ta e federacion di futbol.
E federacion di futbol Concacaf a yega na e conclusion lamentabel aki despues cu a bin Aruba y a haci un inspeccion riba complehonan deportivo pa weganan internacional. Esaki ta segun e comunicado cu nos a ricibi di gobierno.
E inspeccion cu a tuma luga tabata riba Centro Deportivo Frans Figaroa y Centro Deportivo Guillermo Prospero Trinidad, den cual tur dos a wordo desaproba pa Concacaf pa weganan di futbol internacional cu lo tuma luga aki na Aruba. Na ambos Centro Deportivo e luznan di e veldnan no ta na standard y e yerba artificial su calidad ta malo y mester wordo cambia. E veldnan falta scoreboard nan y esaki ta bay bira mandatario otro aña.
E tipo di inspeccionnan aki ta algo normal cu ta tuma luga prome cu weganan internacional wordo hunga. Weganan mester tuma luga na september binidero na Aruba, cual no lo por ta e caso mas.
“Esaki ta un berguensa pa Aruba, pero alabes ta demostra e incapacidad di e gobierno anterior hunto cu Fundacion Lotto pa Deporte”, segun minister Oduber. “Ocho aña largo a laga e veldnan bay atras y awe ni cu rekisitonan basico no por cumpli. Awor a para bira cu Aruba no por hunga ni un wega internacional na su mesun cas mas.” Minister Oduber ta lamenta e situacion aki y alabes kier sigura pueblo cu ‘esaki ta algo cu nunca mas lo sosode’.
