Recientemente a tuma luga un reunion importante entre Presidente di Arubaanse Voetbal Bond (AVB), ing. Richard Dijkhoff hunto cu e Presidente di CONCACAF. Durante e encuentro a entrega copia di e Development Plan Grow Football Aruba.
Despues cu a lansa e plan na Aruba, awor a entreg’e na CONCACAF, cu a keda masha contento cu e desaroyonan tumando luga na Aruba encuanto futbol y sigur awor cu tin un plan di desaroyo.
E Presidente y Secretario General di CONCACAF a keda hopi impresiona cu e plannan cu lo yuda AVB desaroya hungadonan na Aruba cu na final lo tin como resultado eleva e nivel di futbol en general. CONCACAF via di su Presidente a duna su palabra cu nan lo duna asistencia na e federacion di AVB den tur sentido di palabra pa concretisa e plan di desaroyo aki.
Awor mester ehecuta e plan hunto cu e clubnan, Gobierno y tur esunnan envolvi den futbol. CONCACAF a duna su palabra pa yuda y awor ta na Aruba pa brinda su sosten y aporte incondicional.
E tipo di logronan aki ta bin bek debi na e bon relacion cu tin awendia entre AVB y CONCACAF. Ta hopi aña a inverti den e relacion cu e federacion internacional, pa splica nan e vision y e ruta cu ta canando pa logra desaroya y innova futbol riba nos isla. CONCACAF ta uza Aruba como ehempel awendia den Caribe, den logra cambionan drastico den desaroyo di futbol. Den esey e Presidente actual, Ing. Richard Dijkhoff, a hunga un rol importante den e cambio historico aki.
