Santos do Nascimento ta puntra si discrepancia den trato di Alto Comisario y Sr. Endy Croes ta ilustra integridad?

Con un Minister encarga cu Fundacion Lotto pa Deporte por entrega un demanda personal contra e fundacion pa e por ricibi personalmente un suma di 3 miyon florin y no ta considera esaki un conflicto di interes? En esencia, esaki ta e pregunta cu Parlamentario di fraccion di AVP, dr. Ryçond Santos do Nascimento a haci e siman aki.

Santos Do Nascimento a formula un serie di pregunta por escrito pa Prome Minister Evelyn Wever Croes y Minister di Integridad Ursell Arends riba e posicion di Minister Endy Croes, e compania Ernst & Young y Fundacion Lotto Pa Deporte.

“Nos comunidad por a lesa na Mei ultimo, incluso riba e portal di e corant Solo di Pueblo, cu Sr. J.H ‘Endy’ Croes a lanta un caso contra e compania Ernst & Young y Fundacion Lotto pa Deporte. Segun e informacionnan, e interes di Croes den e caso aki ta di 3 miyon florin. E hecho cu Sr. Croes ta e contrapartida di Fundacion Lotto pa Deporte den e caso di corte aki ta ilustra cu e tin un interes personal hopi serio y contrario na e interes di Fundacion Lotto pa Deporte,” Santos do Nascimento a ilustra.

Mirando cu Gobierno ta bisa di kier duna bon gobernacion y integridad un luga prominente den maneho di Gobierno, Do Nascimento a haya importante pa manda un serie di pregunta, pa medio di Presidente di Parlamento.

Interes personal di 3 miyon

Asina e kier sa si e Ministernan por informa si cu e expresion ‘interes personal’ ta dirigi aki riba tur interes cu no ta forma parti di e encargo cu e Minister di Deporte mester tin pa maneha su tarea. Rycond Santos do Nascimento kier pa e Minister di Integridad splica of informa cua ta e interes cu Sr. Croes tin den gana e caso contra Ernst & Young y Fundacion Lotto pa Deporte pa un suma di 3 miyon florin, si esaki ta uno personal of ta uno cu ta mara na su funcion como Minister cu mester para pa interes di e fundacion.

“Minister por informa Parlamento si ta na altura cu Sr. Endy Croes na varios ocasion y recientemente den media a papia di Fundacion Lotto pa Deporte, unda el a priminti cu pronto lo tin biento nobo y cu como tal, e Minister lo kier dirigi activamente? Por informa si conforme e cuadronan di integridad na terceronan, a crea e impresion di conflicto di interes pasobra interes personal di e Minister encarga, esta Sr. Endy Croes lo tin influencia riba su decisionnan relaciona cu Fundacion Lotto pa Deporte,” Santos do Nascimento a sigui den su preguntanan.

“Minister por informa Parlamento si e ta na altura di e hecho cu tin un problema di abuso di poder ya cu e Minister di Deporte awor tin responsabilidad y autoridad importante relaciona cu Fundacion Lotto pa Deporte, ilustra pa e autoridad di nombramento cu e statutonan di e fundacion en cuestion ta duna e Minister di Deporte pa loke ta su directiva y e hunta di supervision?”

Con ta evita maluso di poder y daño na reputacion

E miembro di fraccion di AVP a sigui puntra si e Minister di Integridad lo por informa Parlamento si ta consciente cu e ex Minister di Deporte a usa su autoridad durante Gabinete Wever Croes I, contra interes di Fundacion Lotto pa Deporte, manera Corte di Prome Instancia a determina den su sentencia di 24 di Juli 2019. “Minister por informa si e caso aki no ta mas motibo ainda, pa haci mas esfuerso pa evita cu e funcion di Minister di Deporte un biaha mas ta keda malusa, den e caso aki pa su propio interes, unda e sumanan ta core den miyones?”

E Parlamentario kier pa Minister informa Parlamento si e interesnan intelectual, manera e reputacion di e Minister di Deporte Endy Croes, ta motibo di conflicto di interes, mas ainda pasobra awor e tin un caso contra Ernst & Young y Fundacion Lotto pa Deporte.

E Parlamentario tambe kier sa pakico no a busca un otro funcion di Minister, uno mas adecuado pa Sr. Endy Croes, pero netamente a dun’e un Ministerio unda ta hinca Endy Croes den e posicion cu e por haci maluso di su funcion. “Minister por splica Parlamento con Gabinete Wever-Croes II kier drecha confiansa den estado di derecho y politica na Aruba, si no tuma medida pa por lo menos saca e tarea di Deporte for di e cartera di Sr. Endy Croes y duna esaki na otro Minister. Di e forma aki ta proteha Sr. Croes di maluso di poder mirando cu interes personal di miyones y su interes di reputacion mirando cu tin un caso di corte andando contra Ernst & Young y Fundacion Lotto pa Deporte,” dr. Santos do Nascimento a continua.

Discrepancia Vanessa Tjon Kock y Endy Croes

E Parlamentario a termina su preguntanan por escrito cu un comparacion con a trata Alto Comisario Vanessa Tjon Kock y Sr. Croes. “Minister por informa Parlamento, mirando cu entre otro a nombra Sr. Croes como Minister di Deporte, cu cua autoridad moral por a exigi Sra. Vanessa Tjon Kock pa pone su funcion como Alto Comisario un banda pa asina evita cualkier impresion di conflicto di interes mirando cu su casa a bira Minister di Husticia. Den otro palabra, Minister por informa Parlamento cua ta e motibo pakico tin discrepancia entre e forma con ta trata cu Sra. Tjon Kock compara cu esun di Sr. Endy Croes y si esaki ta duna contenido na integridad,” Rycond Santos do Nascimento a conclui den su preguntanan na Minister Ursell Arends y Prome Minister Evelyn Wever Croes.

Bon Dia Aruba a tuma contacto cu Minister Endy Croes, y ta pendiente su reaccion riba e preguntanan cu Parlamentario Santos do Nascimento a haci.

Potret di Caribisch Netwerk.