Con ta produci y usa hidrogeno?

Produccion di hidrogeno (hydrogen; waterstof) por tuma lugar via diferente proceso y usando diferente materia prima. E proceso mas contempla pa produci energia renovable ta via electrolisis usando coriente pa separa di awa (H2O) e elementonan aki pa haya hidrogeno (H) y oxido (O).

E metodo industrial mas comun ta transforma gas natural cu uso di vapor (steam) loke ta produci monoxido di carbon (CO) y hidrogeno, y tambe hidrogeno y dioxido di carbon (CO2). Tin otro proceso por ehemplo di usa ‘brown coal’ (bruinkool), un fase di formacion natural anterior na conversion den carbon o petroleo, den deterioro di resto vegetal. Bao di presion halto y uso di awa cayente anto ta produci (tambe) hidrogeno.

E bentaha grandi di hidrogeno ta cu ora trece esaki hunto cu oxigeno, den e reaccion quimico ta forma awa (limpi) cu tin su uso tambe. Esaki lo por ta e metodo cu ta contemplando den e caso di Aruba. Si ta usa por ehemplo energia produci via panel solar o molina di biento, esaki lo ta duna un proceso liber di combustible fosil. Localmente nos no tin otro materia prima pa usa pa produccion, manera carbon o ‘brown coal’.

Ta bon cla cu uso directo di energia solar o di biento directamente den e red di distribucion ta resulta mas barata cu uso via produccion di hidrogeno. Hidrogeno lo ta specialmente util pa uso como backup na momento cu otro fuente no ta disponible. Tin proyecto conoci cu ta usa hidrogeno pa backup den e forma aki, mientras produccion di electricidad di panel solar y molina di biento ta percura pa suministro inicial tanto pa produci hidrogeno como pa uso directo den e red di distribucion electrico.

Hidrogeno no ta un materia cu por usa solamente pa produccion di energia. Ta posible pa entrega esaki como materia prima pa varios proceso quimico, manera e produccion di amonia. Nos no ta na altura ainda di tal uso na Aruba mes pasobra no a anuncia esaki. En principio esaki ta un posibilidad di exportacion pa uso diverso, segun e necesidad di e cumprador. Tambe por usa hidrogeno pa transporte di por ehemplo bus y truck ademas di otro vehiculo. Tin un variedad grandi di proyecto na diferente parti di mundo riba e tereno aki.