Rotterdam su conseho municipal a tuma over un proyecto pa genera energia di pan recicla despues cu un test a mustra resultadonan exitoso. Nan a pone mas cu 130 container rond di e ciudad den 85 diferente luga pa colecta pan bieu, cual ta transporta pa vehiculonan electrico na un planta cu ta procesa esaki como biogas.

Organisadonan di e proyecto BroodNodig, entretanto renombra MetdeStad, ademas a ehecuta un campaña di conscientisacion splicando con e containernan ta traha y kico nan lo haci cu e pida pannan cu hende lo laga atras. Mas o menos 22% di e 41 kilo di cuminda cu ta comestibel ta consisti di pan, segun un investigacion haci pa Voedingscentrum di Hulanda.

E plan ta coincidi cu plannan den ciudadnan manera Amsterdam y Den Haag pa stop personanan di tira pan riba caya, cual ta atrae djaca y otro bestianan no desea. E accionnan ta inclui e bakinan aki pero tambe boetnan cu nan lo parti si nan haya bo ta tira pan den espacio publico. Paula Zwitser, fundado di BroodNodig hunto cu 2 colega 3 aña pasa a conta Volkskrant cu informa hende di e proyecto lo ta crucial pa e plan haya exito. E organisacion ta traha hunto cu centronan di bario, moskee, speelplaats y otro facilidadnan. ‘Tin biaha bo djis mester tempo’, el a bisa.

“Bo no por djis laga un baki un caminda y tin expectativa cu e lo bay bon. Bo mester inverti hopi energia desde cuminsamento den papia cu hende y bisa nan pakico e baki di pan t’ey.” Durante ultimo 3 aña 125 mil kilo di pan a keda colecta, suficiente energia pa cende 2 mil lampi LED pa un aña of pa genera suficiente gas pa 50 cas. E organisacion municipal ta planeando pa expande e proyecto por medio di trece colaborado cu lo yuda residentenan colecta mas pan den nan area. ‘Nos soño ta pa esaki bira un maneho oficial di e ciudad’, Zwitser a declara. Ayes Ören, kende tin un facilidad di wega den su bario den Feyenoord, a bisa cu residentenan local ta apoya e iniciativa desde cu nan a compronde, via campañanan riba poster den Hulandes y Turco, cu nan no ta djis tira e pan afo. ‘Den cultura Turco y Marocano bo no tin mag di tira pan afo’, el a bisa. “Den cuminsamento hende tabata preocupa cu e nan lo ta tirando afo e pan, pero ora nan a haya sa cu nos ta recicla nan a join nos.”