E pandemia global ta aumentando nivel di stress den e dianan aki. Y e tin un impacto riba nos salud mental, cu por interferi cu nos trabao.

“Un di e prome cosnan den mente di tur hende ta e incertidumbre rond di nos. Incertidumbre na trabao, famia, scol, of djis bay haci compras. Tin hopi peso riba nos”, segun Benjamin Miller, psicologo y hefe di strategia pa Well Being Trust, un fundacion nacional enfoca riba salud mental y social.

E hecho cu e tin un impacto riba salud mental cu por afecta trabao ta hacie un problema di e dunado di trabao tambe. “Hende cu tin stress y cu ta sinti mas ansioso, deprimi, nan ta bira menos efectivo y menos productivo. Dunadonan di trabao mester tin hopi interes”, segun Liza Gold, psikiatra y profesor clinico di psikiatria na Georgetown University.

Mientras cu un combersacion mas habri y duna recursonan di salud mental na empleadonan por yuda asuntonan des-stigmatisa, toch ta un combersacion dificil pa tin cu bo hefe.

Considera bay cerca HR prome
 Si bo ta sufri di depresion y ansiedad, psicologo industrial-organisacional Amy Cooper Hakim ta sugeri pa bay na departamento di Recurso Humano prome, pa haya sa tocante posibel acomodacion. “Bo mester sigura cu bo ta cuidando bo mes y beneficiando di cualkier recurso cu bo ta haya a traves di bo compania. Tin hopi programa disponibel y diseña specificamente pa esaki.”

Por ehempel, algun programa por ofrece ayudo profesional pa e trahadonan. Hopi compania rond mundo a aumenta nan beneficionan di salud mental desde cu e pandemia a cuminsa, manera agrega app di meditacion gratis y duna tempo off cu pago adicional.

Pero si tin pregunta specifico cu ta relaciona directamente na bo trabao, Cooper Hakim ta sugeri bay na bo supervisor inmediato. Por ehemplo, si bo ta sinti abruma y den stress y mester algun dia extra riba un deadline, esey ta un combersacion pa tin cu bo hefe prome.

Limita loke bo ta bisa
 Tene cuidao cu kico bo ta revela na bo manager, ya cu unabes bo pone algo eyfo, bo no por trek e back, Gold a bisa. “Purba bisa net lo suficiente pero no mas. Si bo bisa tur hende cu bo tin un problema cu depresion severo y mester tempo off pa regla medicamento, awo tur ora bo tin un mal dia den futuro hende lo cuminsa specula”, el a bisa. “Por tin stigma mara na esey.”

El a agrega cu hasta si bo tin un bon relacion cu bo hefe, no mester duna hopi informacion personal na momento di solicita dianan off pa salud mental. E ta sugeri bisa algo manera: Mi ta sinti un tiki burn out, mi a cumpli cu e deadline pero a pasa hopi malo pa logra. Mi por tuma algun dia off pa recarga?

“Mayoria di hende por relaciona cu esey – na luga di bisa: mi ta asina ansioso, mi kier tuma tempo off.”

Keda enfoca riba solucion
 Trece solucion na e combersacion ta haci esaki mas productivo.

Por ehemplo, si e maintanan ta abrumando bo mientras bo ta purba di yuda bo yiunan cu nan les online, sugeri cuminsa traha mas laat. “Trece algo back na e dunado di trabao cu ta permiti pa un win-win, pa bo y pa e hefe”, Miller ta bisa.

Otro opcionnan por inclui solicita recursonan adicional pa yuda termina un proyecto, un schedule mas flexibel, of ayudo pa prioritisa tareanan y deadline pa facilita bo responsabilidadnan.

Sea proactivo
 Si bo sa cu bo trabao ta sufriendo, chens ta cu bo hefe tambe a nota esey. Pues ta miho pa trece esaki dilanti prome cu e bira un problema mayor.

Gold a sugeri bisa algo manera: Mi sa cu mi no ta trahando na mi velocidad normal, mi ta pasando den temporada dificil. Despues, duna un forma concreto con pa bay dilanti, manera asistencia, tuma dianan off, of cambia algun responsabilidad. “Adopta un posicion di resolve problema”, Gold a bisa. “Bo no kier cuminsa necesariamente cu ‘mi no por cumpli cu mi deadline pasobra mi tin un malesa mental’.”

Ta honesto, pero cuidadoso
 Papia tocante bo salud mental ta importante, pero Cooper Hakim ta sugeri ta selectivo cu ken bo ta comparti esaki den oficina.
Si bo tin un colega cu bo ta confia hopi, ta un tentacion pa ta honesto riba kico ta pasando, pero trabao por ta un espacio competitivo.

“Ainda nos mester mantene un comportamento profesional”, el a bisa, agregando cu revela bo problemanan na un colega por trece consecuencia negativo den futuro. El a conseha pa confia den un amigo pafo di trabao na luga di un colega.