(AP) – Prins Bhojwani nunca a pensa di su mes como un persona negativo, te cu tres bishita na hospital den un luna a fors’e pa reconsidera. Prome cu mei 2018, e tabata un fundador di startup saludable pero cronicamente preocupa, kende tegularmente tabata core 32km riba bicicleta. Ora diripiente e casi no por a cana, cu dificultad pa mira y presion halto, dokternan di sala di emergencia a sospecha un atake cerebral, pero no por a haya e causa di su malesa.
Un amigo cercano, sinembargo – “un di e personanan mas optimista cu mi conoce,” el a bisa – a destaca cu Bhojwani hopi biaha no tabatin fe cu cos lo resulta, y a sugeri cu esey a push’e den burn out.
“Mi a cuminsa mira mundo hopi diferente, literalmente e siguiente dia,” segun Bhojwani, kende ta biba na New York City. El a cuminsa medita y tuma un momento cada dia pa sinti gratitud pa ta na bida. E tambe a haya proposito den co-funda un nonprofit, Asana Voices, un organisacion di defensa Sur Asiatico.
Den e añanan desde esaki, e no tabatin ningun crisis di salud similar, a pesar di traha mas ora. E ta duna credito na su perspectiva positivo nobo.
“Despues cu tabatin un evento cu a cambia mi bida, el a forsa mi pa bira optimista,” el a bisa. “Mi no por ni imagina biba bida manera mi tabata haci antes.”
Optimismo riba su mes no ta un cura pa tur cos, pero cantidad di estudio durante decadas a demostra un vinculo entre un perspectiva positivo y miho resultadonan di salud.
Un bida mas largo y saludable?
Expertonan ta bisa cu un standard pa midi e optimismo relativo di un persona pa largo tabata e dies pregunta di e Life Orientation Test-Revised, publica na 1994. (Un pregunta di muestra: Den un escala di 1 pa 5, ta puntra encuestadonan con fuertemente nan ta di acuerdo cu e declaracion: “den momentonan incierto, usualmente mi ta spera lo miho”?)
Generalmente, ta defini optimismo como e “expectativa cu cosnan bon ta bay pasa, of kere cu futuro ta bay ta faborable pasobra nos por controla resultadonan importante,” segun Hayami Koga, un postdoctoral research fellow na Harvard Center for Population and Development Studies. E tabata e autor lider di un estudio na 2022 cu a haya optimismo asocia cu un bida mas largo y un chens mas grandi di biba mas cu 90 aña. Den otro estudio, publica na mei den JAMA Psychiatry, Koga y otro investigadornan a bisa cu optimistanan generalmente a mantene miho funcionamento fisico mientras nan ta enbehece. Nan a observa 5,930 muhe post-menopausa den un periodo di 6 aña.
“Nos sa cu hende mas optimista tin mas probabilidad di biba un bida mas saludable, cu habitonan mas saludable, come mas saludable, haci mas ehercicio,” Koga a bisa.
Mi por siña bira optimista?
Algun persona ta nace mas optimista, pero definitivamente por siña esaki tambe, segun Sue Varma, profesor assistent clinico di psikiatria na Universidad di New York y autor di “Practical Optimism: The Art, Science, and Practice of Exceptional Well-Being.”
Training di optimismo, el a bisa, por mehora satisfaccion di bida y reduci ansiedad. “Hasta si bo no a nace cu e disposicion natural aki pa anticipa resultadonan faborable y mira e glas mita yen, tin habilidadnan cu bo por siña,” Varma a bisa.
Cuminsa pa pone atencion riba con bo ta deal cu incertidumbre, el a bisa. Bo ta preocupa? Asumi lo peor?
Purba di duna otro forma na e pensamento den un manera obhetivo.
Purba imagina e miho resultado posible y un ruta stap pa stap pa yega eynan. Varma ta pidi su clientenan pa describi e ruta den detaye te cu resolve e problema, y ta curasha nan pa disfruta di nan exito. “E ora bo ta tumando bo bida diario como si cos a resulta caba,” el a bisa. “Y bo tin tendencia di ta mas proactivo, mas positivo, mas resiliente, mas adaptable dilanti obstaculonan.”
Haya un sentido di proposito tambe por yuda. Boluntarismo por ta beneficioso, pero pa esnan cu no por haya tempo, Varma a sugeri purba di cambia bo rol na trabao pa alinea miho cu bo interesnan. Esey por ta simple manera un persona cu ta hopi social ta cuminsa organisa salida cu coleganan.
Purba di master un habilidad, sea deporte, musica, idioma of un hobby manera cosemento of ahedres por yuda preveni bo di ‘rumina’ (keda pensa obsesivamente) riba posibilidadnan negativo.
Hasta cu e intervencionnan aki y otronan, no ta facil pa cambia bo pensamento, Varma a nota. Pero practica ta yuda. “E ta un herment, un manera di pensa,” el a bisa. “Mi mester practica tur dia den mi mente.”
