Con nos a yega na un Constitucion

Dia 18 di maart tin un relacion estrecho cu nacemento di Aruba como parti autonomo di Reino Hulandes. E surgimento di un movimento pro un Aruba riba su mes, los di e otro islanan a haya expresion den e declaracion di 18 di maart, pa hopi aña despues haya su continuacion di surgimento di himno y bandera di Aruba.

Den mesun tempo cu tabata lucha y prepara pa logra e Status Aparte, desde e acontacimentonan den añanan 70, desde tempran den añanan 80, tabatin un equipo di funcionario publico cu tabata traha riba e proyecto di e Constitucion nobo pa Aruba. Loke nos ta mira riba website como e producto final ta loke nan a inicia, tumando como base naturalmente loke tabata existi caba den constitucion Hulandes y Antiyano.

Pa conoce algo mas di e parti di nos historia aki, Bon Dia Aruba tabatin un entrevista cu mr. ing Hubert Maduro, conoci como secretario (griffier) di Corte na Aruba pa hopi aña, y despues te cu su pension nos representante na Hulanda den Raad van State. E tabata un di e grupo selecto di hurista cu a traha riba fundeshi di nos socieda, cu ta nos Constitucion.

BDA: Conta nos mas con e promer fase ey di cuminza compone un constitucion a bay y ken tabata e personanan cu tabata designa pa traha den e grupo ey.

HM: A cuminza traha riba e proyecto na 1982. Mi a caba di bolbe di Hulanda despues di mi estudio y graduacion na Universidad di Tilburg y tabata parti di e promer grupo cu tabata traha riba e Constitucion nobo. Promer cu mi graduacion caba John van der Kuyp a acerca mi pa bay forma parti di e grupo di funcionario publico cu tabata traha riba e proyecto aki. Mi no tabata e graduado hoben tipico si, pasobra mi a traha na Aruba como ingeniero na DOW, y despues na Corsou pa Servicio di Inteligencia di Antiyas, y despues mi bay studia ley.

E interes di nan banda tabata pasobra mi a profundiza bastante den e constitucion nobo di Hulanda, cu a bin na vigor na 1983, y cu naturalmente tabata un referencia importante pa e Constitucion di Aruba, banda di e Constitucion di Antiyas. Na september 1983 mi a cuminza na departamento di Asunto Constitucional y Legislacion di Eilandgebied Aruba. E departamento aki tabata sostene dos comision: Un grandi cu tabata e “Raadscommissie Onafhankelijkheid Aruba” (RCOA) y un relativamente chikito cu tabata raporta na RCOA. E ultimo aki tabata e comision pa Constitucion y pa Derecho Administrativo (LAR). Tabata premira cu lo mester bin cu un sistema mas moderno pa ciudadano por cana caminda di corte den caso cu gobernacion semper ta dicidi den promer y ultimo instancia administrativo. Cu tempo nos a haya LAR cu a keda realiza pa un comision di experto for di e comision original, pero despues di 1986.

Na mei di 1984 mi a bay Griffie di Corte pa reemplaza Griffier pero mi a bay cu mi trabao den e comision. E comision di Constitucion tabatin como presidente John van der Kuyp pero na fin ora esaki a bira diputado atrobe, mi a bira presidente, mientras mi tabata basta tempo caba na Corte como griffier.

E trabao di mas grandi tabata e promer capitulo, e derechonan fundamental. E constitucion ta promer legislacion na Aruba cu a skirbi riba un computer (IBM wordprocessor), loke a facilita e trabao hopi, aunke no tabata kita cu huristanan tabata skirbi na man te den marduga, pa den dia e text bay riba wordprocessor. Wordprocessor personal no tabata existi ainda. Na comienzo di 1984 e promer capitulo, di derecho fundamental, a bay pa RCOA pa tratamento den promer tanda riba dia 16 di februari 1984. Finalmente, dia 6 di augustus 1985, den marduga, Eilandsraad a aproba e Constitucion nobo.

BDA: Nos ta tende o lesa hopi biaha di hende di den e ambiente politico di e tempo ey cu ta describi nan papel o participacion den e proceso di creacion di constitucion. Con en realidad e relacion ey tabata, tabatin comunicacion y talvez instruccion di banda di mandatario of otro politico si tabata desea cierto cosnan regla den e constitucion?

HM: Si, tabatin un comision di Eilandsraad cu tabata reuni riba e tema aki. E tabata yama Raadscommissie Onafhankelijkheid Aruba cu a menciona anteriormente. E comision tabata dispone di un comision di experto cu tabata apoya nan . Tabatin den e comision ey abogado Roy Brown, Johan Sjiem Fat, tambe Nephtaly Henriquez y John van der Kuyp. Di parti di e departamento di Asunto di Constitucion tabatin participacion di Harold Munnike, Lily Marval y mi persona, como ambtenaar, como apoyo institucional. Manera por imagina, esaki semper ta un proceso di consulta y discusion. Pa e expertonan tambe tabatin loke bo por yama un ‘momento di educacion general politico’ unda concesion a ser haci pa haya consenso.

BDA: Nos ta lesa na diferente lugar den e splicacion di e Constitucion cu e ta desvia (levemente) di esun di Antiyas of Hulanda. Tin algun ehemplo clave unda nos constitucion ta diferencia?

HM: Si, un di nan a bin dilanti atrobe aña pasa durante e retiro di e anterior ministro encarga cu Infrastructura. Den e caso ey Gobernador a pidi opinion di Parlamento encuanto e retiro, loke den e caso ey tabata logico. Menos logico ta cu den caso cu un ministro mes entrega su retiro, tambe segun e formulacion actual Gobernador ta pidi opinion di Staten, loke den e caso ey, unda ta trata di e deseo unilateral di e persona mes, y den cual e ta completamente soberano, no tin ningun sentido pa Gobernador pidi opinion di Staten; esey na e momento ey ta ‘gepasseerd station’ pasobra bo no por obliga un persona keda riba e puesto si e no kier. Loke ta e caso ta cu contrario na Constitucion di Antiyas, unda ta papia di e nombramento “door de Gouverneur”, den e Constitucion di Aruba ta papia di nombramento “na overleg met de Staten bij landsbesluit benoemd en ontslagen”. Esaki tabata pa acentua cu e nombramento no ta un prerogativo exclusivo di e Gobernador. Den tur caso di nombramento, y di retiro, mester tin un decreto (landsbesluit) firma pa Gobernador y un ministro, pero manera bisa caba, den caso di un retiro voluntario no tin nada di pidi opinion di Staten mas.

BDA: Tin mas cambio, manera e posicion di Promer Ministro?

HM: Si, den e cosntitucion di Antiyas e conseho di ministro ta elegi di su seno un Promer Ministro. A scoge na Aruba, mirando e desaroyonan internacional unda cu por observa e peso aumenta di un promer ministro o ministro presidente, pa formula esaki asina cu e Promer Ministro ta presidente di e Conseho di Ministro, punto. Asina aki e posicon di promer ministro ta haya un base constitucional y ta acentua su posicion como promer responsable pa maneho general di gobierno como un conhunto integral, y pa coordinacion di e maneho ey.

Otro cambio cu tabatin den esaki ta cu a limita e cantidad di ministro na nuebe. Den esun di Antiyas tabatin e posibilidad di cambia e cantidad di ministro via un ley (landsverordening). A opta pa no sigui Antiyas den esaki. Si acaso algun gobierno algun dia kier cambia esaki, nan lo mester cambia Constitucion mes. Pa un teritorio relativamente chikito manera Aruba e tempo ey tabata considera nuebe ministro mas cu suficiente.

BDA: Last but not least, recientemente tabatin algun boroto den Staten, cu tabatin di haci cu e interpretacion di e proceso pa presenta un proyecto di ley pa institui un Ombudsman. Tabata papia di cambio di Constitucion. Aki tabatin discusion si tabata necesario tambe den e votacion pa acepta e propuesta pa ser trata, si tabata necesario pa conta cu dos tercera parti di mayoria pa por habri tal proceso. Finalmente, a opta pa no presenta e proyecto di ley, cu tabata abarca entre otro e introduccion di Ombudsman. Bo por conta nos con bo ta mira e asunto aki?

HM: Segun mi e introduccion di un ley cu ta constitui un Ombudsman como un ‘vast college van advies inzake wetgeving en bestuur’ no ta haci cambio den e Constitucion mes, sino cu e Constitucion ta duna e posibilidad pa regla un institucion asina via un ley (landsverordening). Ta referi aki na articulo IV.9, cu ta regla cu por institui un college permanente di conseho, cu por abarca tur area di trabao di gobernacion, menos rechtspraak. Y den e ley ey ta regla tur structura, composion y facultad di e institucion ey. Cambio di Constitucion no ta parce mi necesario pa regla e Ombudsman den un ley ordinario.