Cada biaha cu un persona ta papia ta transmiti su creencia, riba loke e ta, riba loke otronan ta y riba e futuro. No ta haci falta puntra un hende kico e ta kere, solamente lag’e papia y otronan lo haya sa ki clase di bida e ta bibando, si e ta un victima of si e ta responsabel, si e ta sinti liber y tambe si tin futuro of el a keda den pasado.

E palabranan ta constitui materia prima cu cual personanan ta diseña nan bida. Ora ta papia e palabranan corecto ta pensa pensamentonan corecto, ta p’esey cu mester mantene un actitud corecto y asina por cambia cualkier situacion.

E diferencia entre un persona positivo, optimista y uno negativo, pesimista, ta e manera con nan ta conta loke nan ta pasando. Tin hende cu ta ripiti esey den modo automatico: mi no ta bay logra, no tin solucion, esey nunca a wordo haci. Si ta bay biaha un caminda y no sa papia e idioma, e persona ta bay papia esun cu e ta conoce. Tin hende cu ta papia di un solo manera pa motibo cu esey ta e unico lenguahe cu e ta conoce, pero como e palabranan ta crea e realidad, no por spera otro mundo cu no ta esun cu ta papia.

Palabranan ta simianan, loke ta wordo bisa ta un simia planta den subconsciente y eynan e proceso ta cuminsa. E simia ta desaroya te ora ebira un mata, e mata ta duna fruta; kiermen cu e resultadonan cu tin den bida of esun kier logra, tin relacion directo cu loke ta bisa.

Palabranan ta profecia. Ora un persona ta papia, den su mente e ta scucha su palabranan. Como cu e mente no ta distingui si ta berdadero of falso, tur loke ta ricibi, ta como berdadero. E ora ey e mente ta haci tur lo posibel pa cumpli loke a scucha, kiermen ora ta papia “ta construi realidad”.

Palabranan ta stuurwiel. E manera di papia ta determina e direccion di e bida di e persona. Si ta papia di palabranan di fracaso, e ta move den direccion di e derota, si ta papia palabranan di victoria e ta move pa e exito, e bida ta cambia di direccion cu e boca ta brinda.

Ta p’esey cu tur cos cu ta sucede ta e resultado di loke personanan mes ta papia y nan ta kere, pero for di awe por cuminsa eligi: tene cuidou di loke ta papia ora cosnan no ta bayendo bon. E tendencia ta di papia di e problema, prome cu nos mes, despues cu e otronan, pero papia di dje no lo resolve e problema, al contrario e problema ta crece.

Ora un persona ta bisa “mi no por”, ta enfoca riba su mes, e “ mi no por” ey ta bira un prison traha door di e persona mes.

Kisas a yega di scucha tanto biaha “bo no por” cu e persona a tuma e palabra ey den su interior y a kere den dje. Di tanto “bo no por” el a bira “mi no por”, pero como e creencia ta wordo eligi, e persona ta eligi si e kier bende esey, si por haya e victoria ey, si por ta un pareha feliz, si por studia y gradua.

Memey di momentonan dificil, e palabranan ta hunga un papel importante, nan ta bay influi riba e tempo cu ta bay keda den e situacion y riba e estado den cual e persona lo bay keda. Mientras miho e persona ta papia, mas fuerte e lo ta y mas pronto lo sali for di un situacion.

Papia bon di bo mes. Tin hende cu tin presente e pobresa den su palabranan, tur cos ta sali malo, mi no por, mi tin mal suerte. Ora bo ta papia malo di bo mes, bo mes ta detene e proceso di crecemento, pero ora bo ta papia bon, bo ta continua cu e desaroyo di e persona cu bo kier ta.

Papia bon di otro hende. Tin hende cu tin mester papia malo di otro pa nan sinti bibo, esun cu ta aprecia comentarionan negativo di un persona asina, ta mas infeliz cu e persona mes di ken ta papia malo. Ta p’esey cu mester recupera e poder di algun palabra, como “danki, bo ta hopi amabel, bo no sa con bon bo palabranan ta pa mi, bo ta yuda mi hopi”.

Tambe e salud por deteriora pa via di palabranan no corecto. E tristesa por aumenta si ta papia palabranan no adecua, e relacionnan por wordo destrui si ta bisa palabranan robes. Pero salud por wordo recupera si ta papia palabranan corecto, e felicidad por aumenta si ta papia palabranan adecua y relacionnan por mehora si ta papia cu e miho palabranan. Un persona mes ta eligi kico pa bisa, si ta pa crece of pa keda desanima.