(baynews9.com) — E pandemia a trece cune un variedad di emocion. Mientras restriccionnan ta keda elimina y medidanan ta cambia, e emocionnan tambe ta cambiando.

Psicologo Dr. Steve O’Brien ta bisa cu reunionnan ta yudando algun persona alcansa un estado emocional mas positivo. Pero otronan tin stress. O’Brien ta bisa cu el a mira un aumento di depresion. E ta bisa cu algun persona ta ansioso tocante e posibel proximo ola di e virus. Bayendo dilanti, e ta sugeri evita reaccionnan extremo, desde sinti cu semper tin un menasa te optimismo ciego.

“Mi ta curasha hende pa keda den centro y mi kier yama esey cuidadosamente optimista – unda bo tin un disposicion optimista, un actitud optimista, pero toch bo ta keda consciente y cuidadoso cu tin algun cos pa preocupa. Y bo tambe mester ta consciente cu hende por ta na diferente lugarnan emocionalmente y no husga nan”, el a bisa.

E ta curasha pa continua combersacionnan tocante nivelnan di comodidad. Mientras tanto, e Instituto Nacional di Salud Mental di Merca tin e siguiente recomendacion pa cuida bo mes, kico pa haci den un crisis, y na ki momento busca ayudo profesional.

Tocante cuido propio
 Cuido propio ta nifica tuma e tempo pa haci cosnan cu por yuda bo biba bon y mehora tanto bo salud fisico como mental. Ora ta trata di salud mental, cuido propio por yuda bo maneha stress, reduci riesgo di malesa y aumenta bo nivel di energia. Hasta actonan chikito di cuido propio den bo bida diario por tin un impacto grandi.

Algun tip pa cuminsa:

  • Haci ehercicio regularmente. Apenas 30 minuut di cana tur dia por yuda mehora bo humor y mehora bo salud. Cantidadnan chikito di ehercicio ta acumula, pues no descurasha si bo no por haci 30 minuut den un solo bes.
  • Come saludabel, regularmente, y keda hidrata. Un dieta balansa y hopi awa por mehora bo energia y enfoke durante dia. Ademas, limita bebidanan cu cafeina manera soft drink of koffie.
  • Haci drumimento un prioridad. Keda riba schedule, y sigura cu bo ta hayando suficiente soño. Luz blauw di aparatonan y pantaya ta hacie mas dificil pa pega soño, pues reduci exposicion na luz blauw di aparatonan riba bo celular of computer prome cu ora di bay drumi.
  • Purba un actividad relahante. Explora programa of appnan di relahacion y bienestar, cu por incorpora meditacion, relahacion muscular, of ehercicionan di respiracion. Programa oranan regular pa esaki y otro actividadnan saludabel, manera skirbi den un diario.
  • Pone meta y prioridadnan. Dicidi kico mester haci awo y kico por warda. Siña bisa ‘no’ na tareanan nobo si bo ta cuminsa sinti cu bo ta tumando demasiado. Purba tene cuenta di bo logronan fin di dia, y no loke bo no a logra haci.
  • Practica gratitud. Recorda bo mes diariamente di cosnan pa cual bo ta agradecido. Sea specifico. Skirbi esakinan anochi, of recorda nan den bo mente.
  • Enfoca riba positividad. Identifica y reta bo pensamentonan negativo of inutil.
  • Keda conecta. Tuma contacto cu amigo- of miembronan di famia cu por duna sosten emocional y ayudo practico.
  • Cuido propio ta diferente pa cada persona, y ta importante pa haya loke bo mester y disfruta. Por tuma varios intento y eror pa descubri kico ta bon pa bo. Ademas, maske cuido propio no ta un cura pa salud mental, compronde kico ta causa of ‘trigger’ bo sintomanan leve, y ki tecnicanan ta traha pa bo por yuda bo maneha bo salud mental.

Kico pa haci den un crisis
 Si bo tin pensamentonan tocante causa daño na bo mes of intenta di comete suicidio, papia cu un persona cu por yuda mesora, of yama 911 den un emergencia. Tambe bo por yama Fundacion Respaldo na 281-5000 of 592-5658 pa cualkier ayudo pa salud mental.

Tuma contacto directo cu plataformanan di rednan social si bo ta preocupa tocante postnan di algun contacto, of yama 911 mesora.

Ki ora pa busca ayudo profesional
 Busca ayudo profesional si bo ta experimentando sintomanan cu a dura mas cu dos siman, manera:

  • Dificultad pa drumi;
  • Cambio den apetito cu ta resulta den cambio di peso no-desea;
  • Dificultad pa lanta for di cama pa motibo di humor;
  • Dificultad pa concentra;
  • Perdida di interes den cosnan cu usualmente bo ta haya leuk;
  • Incapacidad pa ehecuta funcionnan usual y responsabilidadnan diario.

No warda te ora bo sintomanan bira abrumador. Papia tocante preocupacionnan cu bo dokter di cas, kende por referi bo na un specialista di salud mental si esaki ta necesario. Por tuma contacto cu Fundacion Respaldo riba nan pagina di Facebook: https://www.facebook.com/RespaldoAruba/

Nota di redaccion: Fundacion Respaldo no a contribui na e articulo aki.