(AP) – Na Lagos, Nigeria su ciudad mas grandi, hendenan ta buscando laga atras nan stress den un asina yama ‘rage room’ unda nan ta kibra tur tipo di cos cu un martiu, tumando un break for di e pio crisis di costo di bida den un generacion.
Shadow Rage Room aparentemente ta e prome di su tipo na Nigeria y ta ofrece un espacio sigur pa hendenan por expresa nan emocionnan wanta paden segun Dr. James Babajide Banjoko, e fundador y un dokter di cas. E idea, segun el a conta, a bini durante e pandemia di Coronavirus den 2020 despues cu el a perde su mama y a experiencia problema cu trabao.
Pa 7,500 naira (5 dollar), e clientenan ta ser laga nan so cu bistimenta di proteccion y un martiu of bat den un camber pa un sesion di 30 minuut cu e cosnan cu despues ta ser recicla.
Temponan ta dificil na Nigeria, e pais di mas di 200 miyon persona unda frustracion ta keda crece entre hobennan a causa manifestacionnan grandi den cual varios persona a ser asesina pa forsanan di seguridad. E tasa di inflacion tambe a yega un nivel sumamente halto di 33.4% mientras e moneda naira a cay na un nivel sumamente abao contra e dollar.
Servicionan di salud mental ta keda inaccesibel pa varios den Africa su pais cu e poblacion mas grandi, unda 40% di su ciudadanonan ta biba bao 2 dollar pa dia.
E nacion tin menos di 400 psicologo registra, segun Nigerian Association of Clinical Psychologists. Esaki ta nifica cu tin un solo psicologo a alrededor di cada mita miyon persona.
Hasta ora cu terapia ta disponibel, stigma ta keda un desafio segun e president di NACP Gboyega Emmanuel Abikoye a bisa den un entrevista. Esaki ta haci cu alternativanan manera ‘rage rooms’ ta ampliamente acepta y usa.
