(ABCEyewitnessNews)—Pa 20 aña, Geeta Parmar-Patel (45) a experencia dolor pisa den tripa for di un malesa comun conoci como malesa di Crohn’s. “Bo ta bay baño hopi. Bo tin hopi inflamacion pasobra tur cos cu bo come ta pasa bo tripa sali,” segun Geeta. “E nutrientenan no ta wordo absorba.”
Dokternan ta bisa cu e malesa di Parmar-Patel ta ilustra clasicamente e conexion entre tripa y celebro y ta bisa cu problema di salud mental manera ansiedad of depresion ta sosode dos pa tres biaha mas frecuente den pashent cu ta sufri di esaki.
“Nos microbiome di tripa y nos celebra tin un comunicacion bi-direccional unda nan ta papia cu otro, y un ta afecta e otro,” segun psicologo Roopal Lalaji. E ta bisa cu depresion por empeora salud di tripa y vice versa, pues pa kibra e ciclo, e a avisa su pashentnan pa stop di consumi productonan procesa y come mas cuminda cu ta mas agradabel pa bacteria di tripa, manera fruta, berdura y bonchi.
“Comiendo un dieet mas balansa ta afecta e structura di nos microbiome di tripa sigur, cual e ora por impacta nos salud mental,” segun e psicologo. Mirando cu stress ta afecta digestion directamente, Laraji tambe ta recomenda pa maneha esaki cu ehercicio.
Parmar-Patel a bisa cu ta purba cana al menos 10.000 stap pa dia, y a cuminsa hunga tennis pa prome biaha den hopi aña. Ademas di tuma medicamento, e a bira vegetariano dos aña pasa. “Mi ta come mas lenteha cu tin proteina y fibra,” segun Parmar-Patel. “Ora mi ta cushinando, mi ta pensa riba cosnan asina.”
E ta traha chicken parmesan pa su famia y un berehein pa su mes. Su malesa di Crohn’s no a solamente bay den remision, pero Parmar-Patel ta bisa cu perspectiva riba bida a bira hopi mas miho: “Si mi tripa no ta bon, ami no ta bon, y esey ta conta pa tur parti di mi,” el a bisa. Geeta a siña cu ta importante pa haya e balans entre tripa y celebro.
