(ElTiempo) – E comunidadnan di afro descendiente na Colombia, agrupa den 271 conseho comunitario, tin 25 aña pidiendo e titulonan di e terenonan cu nan ta ocupa ancestralmente, pero ta sigui sin resultado.
E acuerdo di paz cu Farc, y en particular e punto cu ta referi na e enfoke etnico, a rebiba e speransa di un emision di titulo pronto pasobra, entre otro asunto, el a establece cu e ex guerrilla aki mester a bandona e terenonan cu nan a ocupa den e consehonan comunitario.
Pero un aña despues cu a firma e acuerdo di La Habana, tin preocupacion entre e comunidadnan afro descendiente pa e posibilidad cu e teritorionan cu nan a ocupa ancestralmente y cu awe nan no tin titulo di propiedad di esakinan, por termina declara como tereno sin uzo y por keda reasigna dentro di e plan di distribuicion di tera, cu tambe ta parti di e acuerdo di paz cu Farc.
Un estudio di e Observatorio di Teritorio Etnico y Campesino (Otec), di Universidad Javeriana, cu a registra e existencia di consehonan comunitario na 103 municipio di 18 departamento di e pais, ta indica cu e entidadnan di estado encarga cu tramita e solicitudnan di titulacion colectivo di e comunidadnan di descendencia afro ni sikiera ta conta cu un registro completo di e casonan.
Despues di e likidacion di Incoder (Instituto Colombiano de Desarrollo Rural), e emision di titulo a keda den man di e Agencia Nacional de Tierras (ANT). Nasly Blandón, responsabel di e tema na e institucion, a confirma cu e aña aki ta un conseho comunitario so, di San Antonio y El Castillo, na Valle del Cauca, a obtene titulacion.
E meta, e mesun funcionario ta admiti, ta pa keda cla cu e lista di titulacion di 29 conseho comunitario. Segun e ta bisa, ANT ta trahando pa den loke falta di 2017 keda cla cu 10 solicitud cu ta den revision huridico. “Nos a ricibi un retraso di mas di 200 solicitud”, Blandón a agrega.
E obligacion di estado di formalisa e teritorionan ocupa pa afro descendiente a keda estableci den ley 70 di 1993.
