Mediante un declaracion, Laura Luces, ken ta miembro di comite local pa eleccion primario na Aruba cu ta bay tuma luga e proximo 22 di october, a afirma na Bon Dia Aruba cu pa comunidad Venezolano na Aruba por participa den esaki tin te dia 9 di juli pa por registra.
Pa por participa den eleccion di luna di october, e persona mester ta inscribi na Conseho Nacional Electoral (CNE) y tambe mester ta registra pa vota na Aruba. E campaña aki ta dirigi pa hende cu ta biba na Aruba pero cu no ta inscribi pa vota na Aruba.
Luces a señala cu comunidad Venezolano na Aruba por haci esaki te cu dia 9 di juli y por subi riba e website https://primariaexteriorve.com/ . Aki mester sigui e pasonan como skirbi number di cedula; pa scoge e ciudad mester coloca “Oranjestad” y agrega e-mail y un number di telefon.
Despues e persona ta bay haya un otro e-mail pa asina e datonan por ta valido. Siguientemente e persona mester subi tres potret cu su documento di identidad y den algun ora, e persona lo haya un otro e-mail confirmando e actualisacion di su registro.
“Pa nos ta hopi importante e realisacion di eleccion primario y e inscripcion, pasobra ta e manera cu nos tin pa nos por scoge e candidato di oposicion cu nos kier, no esun cu otronan kier impone nos, y esey ta importante. E unico arma cu nos tin ta e voto y p’esey ta importante pa eherce e derecho aki,” Luces a sigura.
A scoge 80 ciudad rond di mundo pa participa den e actividad aki, na unda e capital di Aruba, Oranjestad tambe a keda scogi. “Ban demostra cu Venezolanonan cu ta biba na Aruba si ta interesa den nos pais y cu nos kier lo miho pa Venezuela”, Luces a expresa.
Luces a menciona cu den 27 dia cu e campaña aki tin, a registra 133.000 persona rond di mundo y CNE den dos decada tin 107.836 persona registra den exterior. “Esey ta nifica cu nos a logra den 27 dia mas di e cantidad di loke nan a haya den 20 aña.”
Tambe el a conta cu for di comienso a considera haci esaki hunto cu CNE debi cu ta existi e “Plan Republica,” cu ta trata di un despliegue militar cu ta tuma luga durante tur proceso electoral, cual tin e proposito principal di salvaguardia e orden y seguridad durante e eleccionnan na Venezuela. Pero despues di morto di presidente di CNE, Tibisay Lucena, a nombra rectornan nobo y oposicion tampoco ta sigui pone nan confiansa riba e organo electoral aki. Na final, Comision Nacional di eleccion primario a dicidi cu nan no ta bay usa CNE pa e proceso aki.
Pa e motibo ey, Luces a enfatisa y a pidi na tur ciudadano Venezolano cu ta biba na Aruba pa registra den e website menciona anteriormente, prome cu dia 9 di juli, pa asina por vota dia di eleccion primario cu ta 22 di october di e aña aki.
