Comunidad Venezolano a sali pa eherce nan derecho di voto den eleccion presidencial di nan pais

Ayera comunidad di Venezuela na Aruba a yega na e Consulado Venezolano pa asina eherce nan derecho di voto den eleccion presidencial pa e Republica di Venezuela. Un eleccion cu hopi controversia, pero cu alabes ta duna e Venezolanonan un speransa cu finalmente nan por conoce un cambio pa nan pais.

Yenny Castro, coordinador organisacional di e comando di campaña CONVZLA na Aruba, a splica Bon Dia Aruba cu e dia a transcuri basta bon. El a indica cu parti mainta nan haya hopi afluencia di votadornan, pero despues di merdia esaki a baha hopi.

Pa loke ta e cantidad di votadornan cu por a eherce nan derecho na Aruba, el a splica cu nan registro di personanan eligibel pa vota, esnan cu ta registra den e Conseho Nacional Electoral, tabata 1366.

El a remarca cu prome cu e proceso di registracion pa votadornan nobo pa e eleccion aki a cera, e cifra aki tabata na 1106, cual ta inclui personanan cu ya caba a yega di registra pa vota den eleccionnan presidencial den pasado y cu automaticamente ta keda registra den e registro electoral.

Pa e eleccion aki solamente 266 votador nobo a logra realisa e proceso di registracion. Cual Castro ta remarca ta un cifra hopi abou, compara cu e cantidad di ciudadanonan Venezolano cu tin na Aruba.

“Ta di lamenta pasobra e comunidad Venezolano ta grandi na Aruba, pero esaki no ta pasobra e hende no tabatin intencion di vota, e problema tabata cu nan a pone pa prome biaha den historia hopi obstaculo pa e registracion. Lamentablemente nos mester bisa cu e proceso aki no ta un proceso ni husto ni igualitario,” el a enfatisa.

El a informa cu pa merdia ainda tabata falta un 40% pa 50% di persona pa yega consulado pa vota.

Tin den cada mesa tin un testigo y den cada mesa tin un secretaria tambe pa vota.

Castro a sigui splica cu e proceso di votacion tabata bastante simpel. Ora e persona yega na mesa nan tabata busca nan den e lista di registro electoral y despues tabata guianan di biaha con pa vota.

E mesa di votacion a cera 6or y pa loke ta specificamente e resultado di Aruba el a splica cu despues cu e prome resultado oficial di CNE sali, nan por cuminsa conta e scrutinio. Den e caso di e resultado total final, esaki ta depende con lihe of poco poco e proceso cana.

“E ta un proceso largo, door cu cada estado mester manda informacion. E ta un proceso cu en realidad no ta suppose di tarda tanto, pero den pasado nos ta mira cu banda di marduga ta haya e resultado,” el a indica.