Vehiculonan UTV ta un topico cu ta permanece na Aruba, algun ciudadanonan ta urgi pa implementa mas medida pa uso di e vehiculonan aki caminda nan ta sigura cu nan ta representa un molester y ta sigui destrui naturalesa.

Den un post riba pagina di Facebook Stop UTV tours Aruba un ciudadano concerni a publica dos potret di Tierra del Sol unda ta mustra e momento despues cu e vehiculonan aki ta pasa dilanti un cas lagando un nubia di stof grandi, siguientemente a publica un otro potret unda ta mustra un paisahe mas claro sin stof. Esaki ta pa duna di conoce e impacto cu UTV tin ora nan ta coriendo den area aki y ta lanta basta stof lo cual diferente fundacion ambientalista a trece dilanti caba den pasado pero cu te ainda, e ta continua.

Den e post cu a haya diferente reaccion di usuarionan di Facebook, tin comentario manera “ No tin ni un politico den isla aki cu tin e balor di pone fin na destruccion sin fin causa na nos isla pa e codicia di companianan operador di tour,” un di nan a expresa.

Un otro usuario a sigura “mi tabata biba den TDS y stof ta horibel, pa no papia di e zonido y destruccion medio ambiental cu nan ta provoca. Nunca mi lo compronde con nan ta permiti esaki.”

Ademas, un di nan a sigura cu “tin mas cu dos luna cu no tin yobidanan y esaki ta algo hopi duro pa vegetacion, bida silvestre y personanan,”

Mientras tanto, ayera atardi Bon Dia Aruba a tuma contacto cu minister encarga cu esaki, Ursell Arends unda el a sigura cu e maneho pa vehiculonan di motor cu ta wordo usa pa huur ta finalisando, sin duna mas detaye.

Por a recorda cu na juli di aña pasa a crea un taskforce pa mantene e maneho pa loke ta trata UTV/ATV y otro sorto di vehiculonan.

Mediante un comunicado pa prensa, e mandatario a sigura cu na Aruba por wak diferente vehiculonan di motor circulando den e careteranan, pa garantisa orden ta necesario pa varios departamento y instancia traha hunto, pa es motibo dia 30 di maart 2023 a institui e taskforce cu ta consisti di Departamento di Transporte Publico(DTP), Korps Politie Aruba (KPA), Dienst Technisch Inspectie (DTI), Departamento di Impuesto (DIMP), Aruba Tourism Authority (ATA) y Ministerio Publico (OM).

E meta di e taskforce ta pa garantisa e cumplimento di ley y reglamentonan relaciona cu UTV, ATV, y otro sorto di vehiculo di motor manera entre otro step electrico y Segways, a traves di un enfoke multi-disciplinario. Tambe lo percura pa un maneho(handhavingsbeleid) relaciona cu velocidad, keuringsbewijzen, recibo di pago, impuesto di vehiculo di motor, standard di conducta (gedragsnormen) y permisonan/vergunning necesario di e vehiculonan di motor menciona. Esaki ta pa trece orden den trafico pa limita e risiconan cu e vehiculonan aki ta trece cune manera accident, lesion y dañonan. Tambe a wordo menciona cu control riba e problematica di auto di huur cu A-nummerplaat lo wordo atendi cune.