Museo Arkeologico Nacional Aruba (MANA) y Club Kibrahacha a uni forsa pa celebra Dia di Himno y Bandera e proximo 18 di maart.

Marguerita Wever, hefe di seccion di Educacion y Presentacion di Museo Arkeologico di Aruba, a duna di conoce cu un biaha mas nan ta anfitrion di Club Kibrahacha riba dia nacional 18 di maart. Den esaki, el a manifesta cu nan ta promove e balor di hende grandi pa e pais.

Dia 18 di maart e salanan di exposicion lo ta habri pa publico, Fundacion 1403 tambe lo bay ta presente pa bende su ultimo publicacion cientifico ‘The Archaeology of Aruba: the pictographs and petroglyphs’, cu ta un catalog di tur e pinturanan riba baranca haya na Aruba.

Museo lo bay ta habri desde 10or di mainta pa 2or di merdia, tambe lo ofrece diferente cuminda crioyo pa brinda pa comunidad te 6or di atardi.

Riba e dia special aki, publico por bishita e exposicion permanente di arkeologia Arubano y e exposicion temporario ‘Caribbean Ties’, cu ta e finalisacion di e proyecto NEXUS 1492, lidera pa Universidad di Leiden, den cual a traha cu diferente instancia di diferente pais den e region di Caribe.

E proyecto di investigacion importante di NEXUS 1492 a haci cu entre otro MANA di Aruba a haya e oportunidad unico pa haci investigacionnan profundo, cu profesionalnan den diferente ramo di experticio. For di e investigacionnan aki a sali hopi informacion y a surgi e idea pa bin cu un exposicion. E exposicion ‘Caribbean Ties’ ta mustra e patrimonio y cultura Indigena y su balor contemporaneo.

Di mesun manera, Wever a bisa cu Museo Arkeologico Nacional Aruba ta espera e bishita di e organisacion di auto clasico ‘Aruba Muscle Car Club’ pa asina hende cu tin interes den esaki por acerca e museo pa saca potret.

Brigitte Loefstop, lider di proyecto di Club Kibrahacha, a trece dilanti cu nan ta bay haci un ‘Sweet Memories Expo’, den cual kier trece e dushi temponan di antes bek converti den un forma di exposicion di pintura y otro elementonan.

Loefstop a sigura cu e meta di esaki ta pa recauda fondo pa e hende grandi di e fundacion y tambe pa mustra cu nunca lo ta laat pa siña algo nobo.

E evento aki di exposicion ta encera pinturanan riba canvas cu paisahenan di Aruba, pinta door di e miembronan di edad di 60+ bao e guia di un juffrouw cu a siña nan diferente tecnica pa pinta. Tambe tin algun di nan traha cu foil of verf di acrilic. Asina mes el a informa cu e obranan lo ta na benta.

Ademas di e pinturanan, tambe lo tin pa e publico asistiendo obranan di man, un seccion di 26 potret di Aruba su naturalesa, parhanan, como tambe cos dushi como bolo, pan boyo, dulce de leche, entre otro.

Como atraccion, Loefstop a comenta cu lo presenta cinco grupo di caha di orgel ubica na diferente luga di e museo, pa hende por saca potretnan cu nan y disfruta di su zonido.