Museo Arkeologico Nacional Aruba conhuntamente cu Fundacion Kapel Altovista lo tene algun actividad e proximo 27 dia april Dia di Rey na Convento di Imeldahof manera nan a anuncia den un conferencia di prensa.

Marguerita Wever di seccion di Educacion y Presentacion di Museo a expresa cu nan ta invita comunidad y specialmente habitantenan di area di Noord pa e evento special cu nan tin planea pa celebracion di Aña di Rey cu lo tuma luga diaranson di otro siman 27 di april na Convento di Imeldahof for di 10or di mainta pa 2or di merdia.

Den actividadnan cu lo tuma luga Wever a splica cu lo tin weganan tradicional como hisamento di flit, por experiencia draaimento di caha di orgel, ademas lo tin cuminda di parti di Fundacion Kapel Bethania y tayer creativo di artistanan local.

Ademas, el a expresa cu tin exposicionnan di Museo Nacional Arkeologico como Caribbean Ties y di Parokia di Noord y di Kapel di Bethania cu tambe lo ta habri e dia aki pa esunnan kier pasa un dia diferente. Entrada lo ta gratis, unda lo tin carchinan cu participante lo por gana premionan cu gremio di bario di Noord a pone disponibel.

Tur actividad ta enfoca riba e participacion unda cu personanan ta bay siña di un manera recreativo y no enfoca riba competencia manera Wever a expresa. Pa loke ta trata e hisamento di flit, el a anuncia cu participantenan por experiencia esaki pa nan mes.

Di su parti Susy Boekhoudt a informa cu Fundacion Kapel di Bethania ta un fundacion relativamente nobo cu tin dos aña den funcion, el a splica cu e fundacion a wordo lanta principalmente pa rescata e Kapel di Bethania cu ta un kapel unico den su originalidad cu Aruba tin y door di esey nan a haya hopi informacion di parokia di Noord unda nan kier colecta e informacion ey pa asina publico tambe por siña tocante historia di parokia di Noord, principalmente di e soeurnan cu a biba na e convento di Imeldahof.

“E soeurnan a haci hopi no solamente pa Noord sino pa Aruba, no solamente den parti religioso sino tambe den e parti educativo y social, esey tambe ta e parti cu e fundacion kier mantene”, Boekhoudt a señala.

Pa dia 27 di april fundacion lo ta enfoca riba cuminda y nan sopi, nan tambe lo bende un carchi di actividad e cual ta costa 5 florin pa recauda fondo pa e fundacion, “cu esaki nos kier promove e participacion di famianan na e actividadnan” cu weganan tradicional manera bulamento den saco, pustamento di taira cu ta weganan di antes cu tabata ser hopi usa y cu actualmente hobennan ta tras di un telefon y ta pa esey cu nan kier promove e actividadnan aki cu manera e mes a sigura, no ta un competencia.

E participantenan tin cu scoge kico nan kier wega na unda cu por ehemplo, si un kier sa con pa hisa un flit nan por haci’e cu un cu lo ta cla caba pa his’e , despues di participa den actividadnan nan tin cu hinca e carchi den un tombola y na final di dia nan lo duna premionan.

Erika Moran a elabora riba e parti di tayer cu e dia aki lo tuma luga door di diferente artista local, un di nan lo ta di Gloria Feliciana cu joyeria cu sea glas cu a ser haya na lama mes, cu e Europeonan a trece den periodo historico den nan decoracionnan, manera cadena y Moran mes lo duna un di pintamento unda el a menciona cu su tecnica di pintamento ta bastante facil cu ta consisti di color full riba canvas.

E idea tambe ta pa comunidad disfruta di un dia creativo, recreativo, cultural y artistico pa disfruta un manera diferente di Dia di Rey, ademas di comparti cuminda crioyo y actividadnan cultural.

Pa finalisa, a informa cu lo tin bendemento di artesania (religioso) y mesanan di wega, manera domino.

Fundacion 1403 lo ta presente pa bende e publicacion arkeologico di pinturanan riba baranca. ‘Lo tin un photobooth’ unda bishitantenan por saca potret cu acesorionan special di Aña di Rey. Nelson Thiel lo ta presente cu su caha di orgel y lo duna grandi y chikito e oportunidad pa experiencia nan mes pa toca e caha di orgel y wiri.