Ayera riba rednan social tabatin un ola di publicacion na unda ciudadanonan tabata expresa nan rabia pa videonan cu tabata circulando, mustrando un grupo di leidster di un crèche unda por mira maltrato di mucha.

Den algun di e publicacionnan aki, usuarionan a publica potret di e leidsternan di e crèche, cual ta e crèche Pasa Dushi Pasa Pret situa na Wayaca. Tambe, den algun di e publicacionnan por mira videonan na unda leidsternan ta maltrata e mucha- y babynan y te hasta tin un voice note tambe ta circula na unda un leidster ta indica cu e la dal un mucha cu slof pasobra e ta haci mala mucha.

E cantidad di reaccion cu e videonan aki a genera ta grandi y ciudadanonan ta haci yamado pa pueblo di Aruba uni pa finalmente stop cu abuso di mucha.

E mesun crèche aki ya caba tabata den noticia dos aña atras, pasobra un baby di apenas cuater luna cu tabata atende e crèche en cuestion a perde su bida sin splicacion riba loke a pasa. Un investigacion grandi a tuma luga, pero e crèche a sigui funciona manera nada no a pasa y aworaki dos aña despues e mesun crèche ta den noticia atrobe pa un otro caso na unda muchanan ta sali perhudica.

Riba rednan social hopi usuario ta cuestiona pakico e autoridadnan concerni no a cera e crèche inmediatamente despues di e fayecimento di e baby na maart di 2022, ya cu e actonan di e leidsternan durante e momento di emergencia, y teniendo na cuenta otro factornan, no a sucede den e proceso of orden cu mester tuma luga.

Pediatra Louise Rafael-Croes tambe a publica un reaccion en conexion cu tur e videonan cu ta circulando rond di e maltrato cu ta tuma luga na e crèche aki.

“Mi ta pediatra aki na Aruba di 1997. Maltrato di mucha ta presente tur dia den mi bida. Mi ta sigui bisa: un sociedad ta mustra su educacion na con nan ta trata esnan mas delicado den nan comunidad. Nan muchanan y nan mascotanan. Kere mi, no ta e crèche aki so ta maltrata mucha, tin algun mas. P’esey nos mester keda vigilante y cada biaha señala e casonan aki. Esakinan ta esunnan scondi: muha un mucha cu slang pasobra e no ta laga marca, behalve esun psicologico, cera un mucha den baño pasobra e trauma no abo so ta bib’e. Y nos lo sigui bringa contra abuso semper!” e pediatra a indica.

Riba un di e videonan por mira con un leidster ta bañando un mucha chikito, pero ta keda muha e mucha cu slang na su cabes, na su cara, mientras e mucha ta yora y grita. Riba otro video por mira con e leidster ta cera un baby den baño mientras e baby ta grita y yora paden, pero e leidster no ta saca e mucha for di baño. Y den otro video por mira con e leidster ta laga e babynan chikito keda grita y yora mientras nan ta riba cama y e no ta haci nada.

Apart di e videonan aki, tin un voice note tambe ta circula na unda un leidster ta informando otro persona cu un di e muchanan ta haci hopi mala mucha y no kier keda keto. “Mi a pone den e stoel bruin, el a baha for di e stoel. Mi a pasa awa riba su cara, mi a pone sinta den e stoel y eynan el a keda, pero mi a pas’e un slof na su chanchan y eynan el a medio calma,” por scucha e leidster bisa den e voice note en cuestion.

Mirando e reaccion cu e videonan a causa ariba rednan social y e disgusto grandi di comunidad, Departamento di Mucha y Hoben (DMH) a publica un comunicado riba nan pagina di Facebook.

“For di luna di maart 2024 DMH ta na altura di tur e video- y preocupacionnan di e mayornan cu ta circula rond. DMH a atende e kehonan segun debido maneho y proceso di nos departamento. E caso lo sigui cana su caminda bao di e departamento asigna pa continua cu esaki. DMH ta sigui para pa cuido, proteccion y seguridad di tur mucha den tur centro di cuido di mucha na Aruba,” e comunicado a informa.

Aña pasa, minister di Husticia y Asuntonan Social a anuncia cu e Ley di Kinderopvang a keda cla y a drenta na vigor. E ley aki ta mara na e rekisitonan di calidad cu cada centro di cuido mester tene cuenta cune, manera e partinan di seguridad, pedagogico, higiena como tambe e desaroyo personal, di henter e personal cu ta traha den e diferente centronan di cuido.

Departamento di Mucha y Hoben a ser finalisa na aña 2022 y un di e tareanan di DMH ta inclui supervision di ehecucion di e ley aki. Adicionalmente, e departamento ta encarga cu e parti di guia, yudansa, preparacion y evaluacion pa practicamente tur e aspectonan cu ta toca e centronan di cuido di mucha, como tambe conseha y sostene cada centro di cuido di mucha, pa loke ta rekisitonan pa yega na e permiso aki.

Ta apenas luna pasa tambe cu diferente doño di centronan di cuido di mucha a anuncia aumento di prijs di nan servicio pa motibo cu mester cumpli cu exigencianan di e Ley di Kinderopvang cu gobierno a introduci.

Den e ley aki tin para un ratio di cuanto baby of mucha mag di tin pa cada leidster y manera e centronan di cuido a indica durante nan conferencia di prensa luna pasa, nan nunca a traha cu ratio, pero awor cu mester cumpli cu esaki nan mester aumenta nan prijs.

Esaki sigur ta trece duda den comunidad, sobretodo entre mayornan, cu tin cu laga nan yiu(nan) na un crèche pa nan por bay traha of cumpli cu nan debernan, si di berdad e muchanan ta ser bin cuida of no mirando cu antes e crèche nan no tabata traha cu ratio, cual por nifica cu e leidsternan no ta brinda e debido atencion na e muchanan pasobra tin demasiado mucha pa cada leidster.