Comunidad ta expresa desconfiansa pa desaroyonan di refineria

Den ultimo simannan, Bon Dia Aruba a publica varios articulo y a dedica mas cu un editorial na e desaroyonan cu a centra riba e firmamento di un ‘Letter of Intent’ entre Refineria di Aruba (RdA), Consorcio Quanten y compania Eagle LNG pa cuminsa opera Refineria di Aruba.

Riba pagina di Facebook di Bon Dia Aruba (facebook.com/bondianoticia), cantidad di lector y internauta a expresa nan opinion riba e desaroyonan aki, y loke a resalta ta un division, entre un grupo di persona cu tabata desea cu lo a bin cu un alternativa y otro grupo cu si a celebra e reapertura pronostica pa Refineria. Sinembargo, mayoria di comentario – negativo y positivo – ta comparti un sentimento di cautela.

Cautela principalmente pa e compania nobo, Consorcio Quanten.
Riba nos Editorial titula ‘Refineria, cabay di campaña… Atrobe/ainda’?, usuario inicialnan B. M. B. a comenta: “Investigation profundo mester..cuanto aña e storia di refineria ta [andando], ken kier bin te akinan trece crudo pa refina aunque tin tanto refineria tambe na Rusia, Merca, etc?”, mientras e ta expresa desconfiansa pa motibo cu e compania ta uno recien. “E compania cu awo bin cu ta bisa tin 3.5 biyon pa inverti, a wordo lanta na juli 2020.

Mester investiga profundamente, pa esaki no bira un 4-7 aña joke… y the joke will be on Aruba.”

El a trece dilanti varios pregunta cu a destaca entre comunidad den transcurso di siman: “Si nan haci promesa cu nan kier traha full refineria nobo, pakico net na Aruba, leu di tur cos. Venezuela no ta den equation. Ami ta kere,[ta un wega, manera semper]. Por ta intencion di e gobierno aki ta uno hopi bon, pero nan mester haci un super screening. Esaki di cuminzamento ta hole straño.”

E desconfiansa aki a keda comparti entre varios otro usuario, cu a comenta riba diferente articulo. Por ehemplo, riba nos articulo titula ‘Letter of Intent a wordo firma pa cuminsa opera Refineria di Aruba back’, dos usuario a comenta expresando duda riba e compania.

Usuario cu inicialnan J.A. a expresa riba cu ta ‘hole strañisisimooo…’ mientras cu F. F. a agrega: “Nan ta parce mas un broker pasobra nan no tin inventario di crudo.”

E actitudnan aki ta refleha tambe un reflexion di nos historia, unda e usuarionan ta mustra cautela basa riba hechonan den pasado unda e resultadonan tabata menos positivo di loke a spera.

Mientras tanto, un grupo tabata desea cu no lo ta negociando un reapertura di refineria, sino preparando un alternativa mas sostenible. Reaccionando riba un articulo di parlamentario di AVP, Mike de Meza, titula ‘E companianan aki no tin acceso na crudo y ningun di nan a opera un refineria’, F. W. a comenta cu lo mester desmantela e refineria ‘y bin cu proyecto di energia solar, cu de paso tin inversionistanan p’e, pero toch ta [scoge] pa e caminda anticua en bes di algo moderno.” El a agrega cu mester ‘scoge loke ta bon pa Aruba su futuro!’.

Ademas, riba nos articulo titula ‘RdA ta kere nos idea ta unda Aruba kier bay, pero no ta den nan cuadro’, representantenan di otro proyecto cu tabata entre e proyectonan alternativo pa desaroya area di refineria, ICSP Aruba (CSP: Concentrated Solar Power) di IPR N.V. a reacciona riba e noticia cu ‘maske nan proyecto ta cuadra precisamente den e vision di unda Aruba kier bay, nan no por bay sigui den e proceso. Den e articulo, Joey van den Berg, director comercial di IPR a conta Bon Dia cu nan no a haya un motibo cla pakico nan no por a sigui. Sinembargo e compania ta determina pa sigui riba nan mes’.

Nos lectornan a mustra desconfiansa pa e compania aki, cuestionando su capacidad pa ehecuta un proyecto di e magnitud en cuestion, ademas di e motibonan pa cual ta boga pa e desaroyonan aki. E.E. a cuestiona si ‘un compania di solar panels lo por crea 2000 cupo di trabao?’ mientras T.V. simplemente a caracterisa e postura di e grupo como ‘that’s really wishful thinking’. Finalmente, B.H a cuestiona si ‘tur e cos aki ta un joke, smoke screen pa campaña’.

Finalmente, Bon Dia Aruba a publica un articulo den cual parlamentario independiente, Daphne Lejuez a trece dilanti varios pregunta. Den esaki, entre otro e parlamentario ta pidi pa ‘informa si ministro presidente ta na altura cu mundialmente tin mas refineria ta cera cu tin bao construccion y cu produccion di combustible fosil a keda reduci considerablemente. Tambe ta puntra si e mandatario ta conoci cu expresionnan haci pa presidente electo di Merca, Joe Biden, cu tin intencion di limita produccion di combustible fosil rapidamente y cu kier inverti den fuentenan di energia alternativo y cu su gobierno practicamente inmediatamente despues di su inauguracion lo firma e acuerdonan di Paris’. Mientras cu usuario V.C. a bay di acuerdo cu ‘ta preguntanan cu ta make sense, si’, usuario M.C. a resumi loke mayoria di esnan den comunidad cu ta mira e desaroyo pa reapertura di gobierno ta pensa di esnan cu ta expresa critica y duda: “Sra. negativo ….kico gobierno haci no ta bon….”

Nota: Redaccion di Bon Dia Aruba a redacta nomber di usuario y e comentarionan cu ta aparece den e analisis aki. Por mira e comentarionan completo riba pagina di Facebook di Bon Dia Aruba.